Rêveberiya kampa koçberên Girê Spî Fadya Xelîl destnîşan kir ku rêveberiya kampê ji bo parastina koçberan ji vîrûsa korona tedbîrên girîng girtin û got: “Heta niha tu dewlet û tu rêxistinan alîkarî ji bo koçberan pêşkêş nekirine, em li gor derfetên heyî parastina koçberan dikin.
Ji ber êrîşên dewleta tirk û hevkarên wê yên li ser xaka Bakûr û Rojhilatê Sûriyê bi hezaran welatiyên Kantona Girê Spî di êrîşa 9’ê Cotmeha 2019’an de koçber bûn.
Rêveberiya Xweser a Kantona Girê Spî ji bo koçberan li bajarokê Til Semin ê girêdayî bajarê Reqqayê kampa koçberên Girê Spî ava kir.
Rêveberiya kampê li gor derfetên heyî alîkariyê pêşkêşî koçberan dike û ji bo parastina koçberan ji vîrûsa Coronayê tedbîrên girîng girtin.
Derbarê mijarê de Rêvebera kampa koçberên Girê Spî Fadya Xelîl axivî, behsa tedbîrên ku girtine kir û got:
Ji bo em karibin li hemberî vîrûsa corona gelê xwe biparêzin, di aliyê tenduristî de me tedbîr girtin.
Rojane bijîşk tên kampê û karê xwe didin meşandin.
Bi rêya komînan ji bo parastina ji vîrûsa corona gel hat hişyarkirin. Çûyîn û hatina ji kampê di vê demê de hatiye seknandin.
Di kampê de dikan hene û koçber pêdiviyên xwe yên rojane jê digirin.
Hin nexweş hene em nikarin li kampê wan derman bikin, wan dişînin bajêr û dema ku vedigerin ji aliyê desteya tenduristî ve tên kontrol-kirin, piştre derbasî kampê dibin.
Pêwistiya koçberan bi devpûşk, lepik û alîkariyê heye. Ji ber vê yekê koçber zehmetiyên dikişînin û heta niha ti rêxistinan alîkarî ne-kirine.
Fadya dawiyê got:
Êrîşên dewleta tirk û çeteyên wê li ser gundewarên Girê Spî dewam dikin, welatî neçar dimînin ku berê xwe bidin kampê.
Ji bo vê jî me amadekariyên xwe kirin û li dervayî kampê kon amade-kirine.
Malbatên ku ji ber êrîşên dewleta tirk koçber dibin 15 rojan di konan de li derveyî kampê tên bi cih kirin.
Rojane bijîşk wan kontrol dike, piştî 15 rojan ger ku nîşaneyên vîrûsê bi wan re nebin em wan derbasî kampê dikin.
