DYA’ê dîsa metirsiya xwe der barê planên dewleta Tirk ên bikaranîna pergala parastina hewayî ya S-400 a Rûsyayê de destnîşan kir.
Wezareta Derve ya Amerîkaryê fikarên xwe derbarê mijarê de anî ziman û tekez kir ku cezakirina Tirkiyê li gorî qanûna CAATSA hîna di rojevê de ye. Lê tevî wê jî, Tirkiyê di bikaranîna S-400 de bi israr e.
Di wextekî de ku nakokiyên navbera Amerîka û Rûsyayê de kûrtir dibin, dewleta Tirk xwe di nava çiravekê de bê çare dibîn.
Tevî ku dewleta Tirk hewl dide bi her awayî ji bo mijara S-400 Amerîka nerm bike, lê ya dawî di helwesta xwe de bi israr e.
Berdevka Wezareta Derve ya Amerîkayê Morgan Ortagos diyar kir ku hin rapor hene diyar dikin ku Tirkiyê di bikaranîna pergala Rûsî ya S-400 de bi israr e.
Morgan ortagos: Spandina cezayan li dijî Tirkiyê di rojevê de ye
Ortagos fikarên xwe anîn zimên, qanûnên cezayên CAATSA bibîrxist û got:
Girêbesta S-400 heta niha astengiyeke mezin di têkiliyên dualî û yên NATO`yê de derxistine.
Em bawer dikin ku Erdogan û berpirsên wî helwesta me fam dikin û sepandina cezayan li gorî qanûna CAATSA hîn di rojevê de ye.
Berpirsên Tirk: Tirkiyê ji bo bikaranîna pergalê bi israr e
Têkildarî mijarê hin berpirsên paybilind ên dewleta Tirk ji ajansa Reutersê re piştrast kirin ku derengmayîna bikaranîa pergala S-400 ji ber vîrûsa Coronayê bû û Tirkiyê ji biryara xwe venagere.
Şêwirmendekî Amerîkî: Eger Tirkiyê S-400 bi kar anî wê congress bêdeng nemîne
Beriya çend rojan jî şêwirmendê mezin li wezareta derve ya Amerîkayê Richard Outzen ji bo heman mijarê destnîşan kiribû ku bikaranîna Tirkiyê ya pergala S-400 wê aloziyeke mezin di navbera Tirkiyê û Amerîkayê de bi xwe re bîne.
Richard Outzen da xuyakirin ku eger Tirkiyê pergala S-400 bikar anî wê Congress bêdeng nemîne û ceza wê li hêviya Tirkiyê bin.
