Zêdeyî 3 milyon kes heta niha li seranserê cîhanê bi vîrûsa coronayê ketine û nêzî 300 hezar kesan jî jiyana xwe ji dest daye.
Li Amerîka ku niha navenda vîrûsê ye, Trump careke din êrîşî Rêxistina Tendursiyê ya Cîhanî kir û ew bi hevkariya bi Çînê re tewanbar kir. Li Afganistanê jî ji ber metirsiya belavbûna vîrûsê, bi sedan girtî hatin berdan.
Vîrûsa corona hîna jî li cîhanê belav dibe û navenda wê jî hîna Amerîka ye.
Li Amerîka rojane bi hezaran kes jiyana xwe ji dest didin.
Lê xuya ye ev kesên dimrin, piştî mirinê jî xwedî li wan nayê derketin.
Li Kolanên New Yorkê û li pêşiya saziyeke xizmetên cenazeyan, cenazeyên nêzî 100 kesan ku jiyana xwe ji dest dane û di erebeyên normal de hatine bicihkirin hat dîtin.
Li ser giliyê cîranan, desthilatdariya welat ew cenaze ji wir rakirin.
Trump: Rêxistina tendurisiyê hevkariyê bi Çînê re dike
Li aliyekî din Serokê Amerîka Donald Trump careke din, êrîşî Rêxistina Tendurisiyê ya Cîhanî kir.
Trump diyar kir ku Rêxistin aghiyên rast parve nake û hevkariyê bi Çînê re dike.
Misilmanên li Amerîka hewl didin Remezana xwe geş bikin
Remezana îsal jî di bin bandora vîrûsa corona de maye û hemû rê û resmên vê mehê ne weke salên berê derbas dibin.
Misilmanên li Wîlayeta Michigan a Amerîka, hewl didin ku remezana xwe geş bikin û bi awayên cuda kêfxweşiyê li derdorê belav bikin.
Ji bo wê jî pêşbirka, ‘şewqên balkonê yên remezanê yên herî xweşik’, organîze kirin.
Li Afganistanê bi sedan girtî hatin berdan
Li gelek welatên cîhanê ji ber metirsiya belavbûna vîrûsa corona li girîtgehan, heta niha bi hezaran girtî hatine berdan.
Herî dawî li Afganistanê bi sedan girtî hatin berdan.
Ev girtî bi rêz sekinî ne û li benda belgeyên xwe yên serbestberdanê ne.
Ji ber Corona werzişvan, bi awayên cuda xwe perwerde dikin
Ji ber vîrûsê hemû qadên jiyanê bandor bûne..
Yek ji wan jî qada sporê ye.
Li Bosnayê, kesên spora avjeniyê dikin, ji ber ku qedexeya derketinê heye û nikarin derkevin, ew bi awayên cuda xwe perwerde dikin.
Şahiya xwe li ser ban li dar xistin
Di serdema vîrûsê de, bûyerên kêfxweşî û xemgîniyê ketin nava hev.
Ji ber belavbûna vîrûsê hemû kombûn hatine qedexekirin.
Ji bo wê jî li Îsraîlê van herdu kesan ku nekarîn şahiya xwe ya zewacê bi awayekî girseyî li dar bixin, şahiya xwe li ser banê malê li darxistin.
Zêdeyî milyonek kes ji vîrûsê rihet bûne
Li seranserê cîhanê heta niha zêdeyî 3 milyon kes bi vîrûsa corona ketine û nêzî 300 hezar kesan jî jiyana xwe ji dest dane.
Lê belê li gel van daneyên xemgîn û bi êş, daneyên baş hene.
Ew jî ew e ku heta niha zêdeyî milyonek û 200 hezar kes jî baş bûne û jiyana xwe ya normal dewam dikin, ango ji mirinê xilas bûn.
