Di bin siyaseta faşîzma AKP-MHP’ê de, li tirkiye û bakurê kurdistanê tundî zêde dibe.
Piştî zêdekirina erkê polîsan ku dikarin tundiyê bikar bênin, vê car bi qanoneke nû erkê bekçiyan jî hate zêdekirin.
Êdî wê bekçî çekê hilgirin û bikar bînin.
Ger bi kinahî were gotin, faşîzma AKP’ê li nava Tirkiyê arêşek ya bekçiyan da avakirin û beşeke civakê li dijî beşa din biçek kir.
Daxwaza qanûna ku erk, hêz, peywir û rol dide notirvan/bekçî yên tax û kolanan li Meclîsa Tirkiyeyê hat qebûlkirin.
Zagona ku ji 18 xalan pêk tê, destûr dide ku bekçî wekî polîsan xwedî hêz û erk bin.
Hikûmeta AKP-MHP’ê qanûna ku hêz, erk, raye û rol dide bekçiyên tax û kolanan ku wekî polîsan karibe rahêje çekê û li gorî daxwaza xwe çekê bikar bîne, şevê din anî rojeva meclîsê û ji aliyê meclîsê ve hat qebûlkirin.
Bekçiyên tax û derdorê êdî dê raye û hêza wan ji ya polîsan ne kêmtir be.
Dê karibe wekî polîsan li nasname binere, ser welatiyan lêgerîn bike û wekî polîsan çekê jî li dijî welatiyan biteqîne.
Bi vê yekê êdî notirvan/bekçê û polîs xwedî heman rol û misyon in û tenê navê wan ji hev cuda ye.
HDP: Hêza Ramîlîter ava dikin
Li ser navê koma HDP’ê Parlamentera HDP’ê ya Agiriyê Dilan Dirayet Taşdemir, bertek nîşanî vê qanûnê da û anî ziman ku deshilata AKP’ê li gorî xwe zagon û hiquqê ava dike.
Dîlan Taşdemîr diyar kir ku zagona bekçiyan mînaka vê yekê ya şênber e û wiha got:
“Em dipirsin çima pêdiviyê bi vê zagonê dibînin.
Çi tişta ku polîs nake heye.
Ev pir aşkere avakirina hêza sivîl a bi pere ye.
Bi vê yekê dê li her derê welatî di bin çavdêriyê de bin.
Dê mirov li ser derê bên şopandin.
Dema em bixwazin daxuyaniyê bidin çapemeniyê vê carê em ê bekçiyan li pêşberî xwe bibinin.
Parlamenterê CHP’ê yê Stenbolê Mahmut Tanal jî anî ziman ku ev peywira ku daye bekçiyan nayê qebûlkirin.
Li gorî daneyên dawîn ên ku ji aliyê Wezareta Hundir a Tirkiyê ve hatine parvekirin li seranserê tirkiye 21 hezar û 347 bekçî hene.
