Ji ber sûcên dermirovî ku çeteyên dewleta Tirk li Lîbyayê pêk tînin, Artêşa Niştimanî daxwaza darizadina Erdogan dike. Herî dawî jî, jimareke çeteyên DAIŞ’ê ji rojavayê Lîbyayê derbasî başûrê wê bûn. Fransa jî dibêje ku kirinên dewleta Tirk li Lîbyayê nayên qebûlkirin.
Berdevkê Artêşa Niştimanî Ehmed Mismarî ragihand ku, li Lîbyayê, di bin sîwana dewleta Tirk de, sûcên dermirovî pêk tên û diyar kir ku divê Erdogan li ser van sûcan were darizandin.
Mismarî destnîşan kir ku serokkomarê Tirkiyê lava dike ku zeviyên petrolê yên li Lîbyayê desteser bike û got; “Lê ev xewna wî pêk nayê, herwekî ku hemû hewldanên wî yên derbasbûna bajarê Sêrtê bibin ketin.
Berdevkê Artêşa Lîbî diyar kir ku, li herêmên petrol li wan hene, gelek kompaniyên biyanî hene û ev tê wateya binpêkirineke navnetewî.
Duh, Artêşa Niştimanî, ji bo destekdayîna yekîneyên leşkerî yên li eniyên Sêrtê, hêzeke din a leşkerî ber bi wir ve şand.
Jimareke çeteyên DAIŞ’ê derbasî Başûrê Lîbyayê bûn
Li aliyê din, çavkaniyên ewlehiyê yên Lîbî eşkere kirin ku jimarek çeteyên DAIŞ’ê ji rojavayê Lîbyayê, derbasî devera Ebû Qedqûd a li nêzî bajarê Birak El-Şati ya li başûrê welêt bûn.
Çavkaniyan diyar kir ku bêhtirî 30 maşîneyên leşkerî, ku bi çeteyan barkirîbûn, derbasî devera Ebû Qedqûd bûn.
Di vê derbarê de, pisporê leşkerî Cibrîl Mihemed da zanîn ku, mebest ji derbaskirina van çeteyan bo başûr rojhilatê welêt, desteserkirina baregeha Teminhent û veqetandina wê ji hêzên leşkerî yên li Cefra û Sêrtê ye.
Fransa: Siyaseta dewleta Tirk li Lîbyayê nayê qebûlkirin
Di heman demê de, duh Fransayê ragihand ku destwerdana Tirkiyê li Lîbyayê nayê qebûlkirin û da zanîn ku belavkirina 7 keştiyên şer li beravên Lîbyayê, qanûna navnetewî ya qedexeya şandina çekan bo vî welatî binpê dike.
Serokkomariya Fransayê diyar kir ku, dewleta Tirk, di bin navê NATO’yê de, li Lîbyayê tev digere û Fransa ti carî vê yekê qebûl nake.
Îna borî, Yekîtiya Ewrûpayê daxwaz ji NATO’yê kiribû ku ji bo pêkanîna qedexeya şandina çekan bo Lîbyayê alîkariyê bike.
