Amerîka ragihand ku ew bi Îsraîl û Îmaratê re gihaştine lihevkirineke aştiyê ya “dîrokî”. Îsraîl jî da zanîn ku ew ê bi vê yekê plana tevlîlkirina Difa Xerbî bi paş bixin. Ev ragihandin rastî nerazbûna Filistînê hat û banga civîneke lezgîn li Komkara welatên Ereb kir.
Peymanek din a aştiyê, gelo wê dawî li nakokiyên bi dehan sal ên navbera Îsraîl û Filistînê bîne.?
Serokê Amerîka Donald Trump duh ragihand ku wan, Îsraîl û Îmaratê ji bo pêkanîna aştiyê û asakirina têkiliyan gihaştine lihevkirinek “dîrokî”..
Trump got:
Êdî dem hat ku berf bihile û gelek welat heman gavê bavêjin..
Hersê welatên navborî, duh daxuyaniyek hevpar da û teqez kir ku lihevkirin wê tevlîkirina erdên Filistînê bo Îsraîlê rawestîne û têkiliyên yekser di navbera Îsraîl û Îmaratê de çêbike.
Li gorî daxuyaniyê, wê ev yek aştiyê li Rojhilata Navîn pêk bîne, herêmê ji aliyê aborî ve geş bike û têkiliyên gelan xurt bike.
Serokwezîrê Îsraîlê Benjamin Netanyahu ragihandina vê peymanê weke “rojeke dîrokî” bi nav kir û got:
Ev peymana me û Îmaratê, ji bo pêşeroja herêmê girîng e û tam ji bo aştiyê ye..
Ji aliyê xwe ve, Mîrê Ebû Zebî yê Îmaratê Mihemed Bin Zayid Al Niheyan jî duh ragihand ku welatê wî û Îsraîl dest bi danîna nexşerêyekê kiriye da hevkariyê geş bikin..
Gelek welatên Ereb û yên cîhanê ev gav erênî nirxand û weke “peymana herî baş ji bo her aliyî” bi nav kirin.
Filistîn peymana Îsraîl, Îmarat û Amerîka red kir
Lê ji bo Filistînê, ev yek ne baş hat û desthilata wê, ev peyman red kir û banga civîneke awarte li Komkara Welatên Ereb kir.
Her wiha ji Rêxistina Hevkariya Îslamî jî xwest xwe helwesteke neyînî nîşan bide.
Tirkiye: Wê dîrok Îmaratê efû neke
Dewleta Tirk jî bê bersiv nema û li ser zimanê Wezareta xwe ya derve got:
Wê dîrok û wijdana herêmê, ti carî durûtiya Îmaratê ji bîr û efû neke.
Jixwe ev peymana “asakirina têkiliyan” ne ya yekê bi Îsraîlê re, berî niha 1979 navbera wê û Misirê û 1994an navbera wê û Urdinê de jî pêk hatiye..
Çavdêr dibêjin ku ev peyman wê tejikê ji bin kes û dewletên ku doza Filistînî weke amûr bi kar tînin, bikişîne.
