Artêşa Lîbî 4 çeteyên DAIŞ’ê li Başûrê welêt kuştin

Artêşa niştimanî ya Lîbî li dijî şaneyeke çeteyên DAIŞ’ê ku xwe li başûrê welêt bi cih kiribû, operasyonek pêk anî û di encamê de 4 çete hatin kuştin. Çeteyên li Terablusê jî, ji bo serweriya bajêr, bi çekên giran pev dikevin.

Çavkanîne leşkerî yên Lîbî ragihand ku li dijî şaneyeke DAIŞ’ê ku plan dikir li başûrê welêt, êrîşên çeteyî pêk bînin, operasyoneke serdegirtinê pêk hat.

Çavkaniyan, ji malpera El-Eyn re diyar kir ku girûpeke leşkerên tûgaya Xalid Bin Welîd û odeya ewlekariyê ”Mirziq” a girêdayî artêşa niştimanî, bi ser veşartgeheke çeteyên DAIŞ’ê ya li devera Xedwe li başûr rojhilatê Lîbyayê de girt.

Di serdegirtinê de, di navbera her du aliyan de şer derket û di encama vî şerî de, yek ji wan biyanî, 3 çeteyên DAIŞ’ê hatin kuştin.

Her wiha ji ber dorpêçkirina wan jî, çeteyekî bi kembera teqîner xwe kuşt.

Di nava 48 saetan de, ev duyemîn operasyona artêşa niştimanî li dijî çeteyên DAIŞ’ê li başûrê Lîbyayê ye, ku Îna borî jî operasyonek li ”Wadî El-Heyat” pêk hatibû.

Di vê operasyonê de jî, 9 çete hatin girtin.

Di nav wan de, 2 serçeteyên biyanî yên tirsnak ku li ser asta navdewletî dihatin xwestin, hebûn.

Duh, Artêşa Niştimanî ya Lîbî eşkere kiribû ku, Tirkiye bi rêya Rêxistina Gurên Boz, çeteyên DAIŞ’ê yên ji Sûriye û Iraqê ku weke komên çete yên di lîsteya Konseya Ewlehiyê ya Navdewletî de tên naskirin, dişîne Lîbyayê.

Li Terablusê, çete bi çekên giran pev dikevin

Her wiha îro serê sibehê li Terablusa paytext jî, ji bo serweriya bajêr, şer û pevçûn di navbera çeteyan de derket.

Li gorî agahiyan, Çeteyên Misrata, Ziwara û Tacûra’a, bi desteka çeteyên Sûrî, gelek maşîne û tank kom kirin, da ku çeteyên Imad El-Terabulsî ji paytextê derxînin.

Ji aliyê xwe ve El-Terabulsî jî, ji bo parastina deverên xwe, çekên giran bi kar anîn û heta niha jî şer berdewam e.

Piştî derketina artêşa niştimanî ji Terablusê, ji bo serweriya bajêr, şer û pevçûn di navbera çeteyan de derdikeve.

Back to top button