Parlamenterê Partiya Çep a Swêdê û Berdevkê Polîtîkaya Derve Håkan Svennelig diyar kir ku piştî girtina doza kuştina Serokwezîr Olof Palme, wê mijara derxistina PKK’ê ji lîsteya rêxistinên terorê bixin rojeva Swêd û Yekîtiya Ewropayê.
Serdozgerê Swêdê Krîster Peterson, piştî lêpirsîna 34 salan, dosyeya kuştina serokwezîrê berê Olof Palme girt.
Peterson, bi rêya vîdeokonferansê civîneke çapemeniyê li dar xist û diyar kir, ku ji ber gumanbar Stîg Engstrom miriye, lêpirsîn nikare were kirin.
Olof Palme, 28’ê Sibata 1986’an, bi şev dema ew û hevjîna xwe ji sînemayê vedigeriyan malê, hatibû kuştin.
Di Çileya 1987’an de serdozgerê demê Hans Holmer, ji cinayetê PKK sûcdar kir û êrişek berfireh, bir ser Kurdên li Swêdê.
Berdevkê Polîtîkaya Derve ya Partiya Çep Hakan Svennelig û Ehmed Ûlûsoy ku ji ber kuştina Olof Palme bi salane bû mexdûrê zextên dewleta Swêdê, ji ajansa Firatê re axivîn.
Hakan Svennelig bi bîr xist ku di lêpirsîna kuştina Palme de kesên bi kuştinê dihatin sûcdarkirin gelek caran hatin guhertin, rayedar bi pey şopa şaş ketin, giranî dan ser kes û komên şaş û îdîaya sûcdarkirina PKK’ê mînak nîşan da.
Berdevkê Polîtîkaya Derve ya Partiya Çep anî ziman ku serdozger, Stig Engström weke kujerê Palme nîşan da û bi vî rengî doz girt.
Hakan Svennelig diyar kir ku pêwendiya Enström a bi kuştinê hate lêkolîn, lê di heman demê de derfetên dewletê ji bo şopandina PKK’ê hatin bikaranîn.
Svennelig têkildarî daxwazên ku divê ji komele û saziyên Kurdan lêborîn bê xwestin û PKK ji lîsteya rêxistinên terorê bê derxistin, ev nirxandin kir:
“Ev daxwazeke di cih de ye.
Gelek malbatên Kurd bûn mexdûrê zextên saziyên Swêdê.
Ji aliyê polîsan û saziyên din ve hatin şopandin.
Li Parlamenta Swêdê, yekane partiya ku dixwaze PKK ji lîsteya ‘rêxistinên terorê’ bê derxistin Partiya Çep e.
Partiyê di kongreya xwe ya sala 2016’an de ji bo PKK ji lîsteya rêxistinên terorê bê derxistin, wezîfe dabû rêveberiya partiyê.
Svennelig destnîşan kir ku ew ê di dema herî guncaw de mijara derxistina navê PKK’ê ji lîsteya rêxistinên terorîst bixin rojeva Parlamenta Swêd û Yekîtiya Ewropayê.
Ehmed Ûlûsoy ku ji sala 1983’an ve li Swêdê ye, anî ziman ku wê demê weşanên Tevgera Azadiyê ya Kurd bi hêsanî li Swêdê dihatin belavkirin.
Ûlûsoy diyar kir ku Kurd weke qurban hatin hilbijartin û got,
“Di şexsê me de mohra terorîst li PKK’ê xistin.
Rojek piştî kuştina Palme xwestin ku berpirsyariya kuştina Palme bixin stuyê PKK’ê.
Wextekê hate gotin bûyer ji aliyê polîsê Swêdê ve hatiye kirin.
Ûlûsoy anî ziman ku ewê di aliyê qanunî de xebatên xwe bidomînin.
