Rêveberiya Xweser derbarê daxuyaniyên Esed ên dawî ku li dijî pirrengiya çandî û olî ya Sûriyê bûn daxuyaniyek nivîskî da.
Rêveberiyê di daxuyaniya xwe de, diyar kir ku siyaseta hikumeta Şamê ya nenaskirina tevahî pêkhateyan, sedema sereke ya kurbûna aloziya Sûriyê ye. Rêveberiya Xweser bang li Esed kir ku pêkhateya Ereb ji bo xizmeta siyasetên xwe bi kar neyne.
Rêveberiya Xweser a Bakur û Rojhilatê Sûriyê derbarê daxuyanên Serokê hikumeta Şamê Beşar Esed daxuyaniyeke nivîskî parve kir û destnîşan kir ku ev nixandin ji bo rastiya li ser erdê şaş e û bandoreke mezin li kûrkirina aloziyê dike.
Rêveberiya Xweser diyar kir ku hikumet li hemberî gelek tiştan ne vekirî ye û ev nirxandina teng a pêkhateya Ereb, tê wateya înkarkirina eşkere ya pêkhateyên din ên resen li Sûriyê.
Rêveberiyê bang li Esed kir ku pêkhateya Ereb ji bo xizmeta siyasetên xwe bi kar neyne, ji ber ku bi rêya daxuyaniyên bi vî rengî, ti car aloziya Sûriyê çareser nabe.
Rêveberiya Xweser teqez kir, ku ew rêzê li hemû pêkhatiyên Sûriyê digirin û got:
Înkarkirina pêkhate yan gelekî ji gelên Sûriyê, dewlemendiya civakî, çandî û olî li Sûriyê tune dike.
Ev tunekirin jî xizmeta pêşeroja Sûriyê û yekitiya gelê wê nake, berevajî wê hemû hewldanên parçekirina yekîtiya civakî hêsan dike.
Berî çend rojan, Beşar Esed li pêşiya nûnerên Wezareta Ewqafan a Sûriyê, şaristaniya hemû pêkhateyan mandel kiribû û gotibû:
“Bila ti kes behsa şaristaniyan ji min re neke, ti şaristanî ji bilî ya Ereban, li Sûriyê tune ye.”
