Eyn Îsa û êrîşên bênavber, rojeva rojane ya van herdu mehên borî bûn. Ji ber van êrîşan, belavbûna top û mûşekên neteqiyayî, li navçeyê bûye tiştekî asa û ev jî jiyana sivîlan dixe metirsiyê. Fermandarê Giştî yê Meclisa Leşkerî ya Girê Spî Riyad El Xelef, ev yek piştrast kir û bi bîr xist ku topên dewleta Tirk a dagirker bi awayekî hovane li ser navçeyê hatin barandin, lewma jiyana şêniyan ji ber bombeyên ku dibe di her kêliyê de biteqin, bi metirsiyê re rû bi rû ye.
Zêdeyî 64 rojan Eyn Îsa û derdora wê, rastî êrîşên herî hovane û bi hemû çekan ji aliyê Tirkiyaya dagirker ve, tê.
Êrîşan ji 23’ê Mijdara borî ve dest pê kirine û tê de gelek cureyên topên hawan, topavêj, mûşek û tank hatine bikaranîn.
Ji bilî topên ku gelek dever aramnc kirin û ziyanên mezin li pey xwe hiştin, gelek top û mûşekên neteqiyayî jî hîna li herêmê, belav in.
Ajansa nûçeyan ANHA’yê ragihand ku topên tankan û hawanê li nava malan û derdora rêyên navçeyê belav bûne û tekez kir ku bi dehan top li gundên El-Mişêrfe, Cehbel û Meilek ên li ser rêya M4 hene.
Şervanên QSD’ê jî li nêzî gundê Meilek li ser rêya M4, bermahiyên mûşekekê ji cureya “Tow” ku bi temamî neteqiyabû, dîtin.
Di 27’ê Mijdara borî de ji ber teqîna topekê li nêzî gundê Ebû Sira yê li ser rêya M4, 2 zarokan jiyana xwe ji dest da û 2 kes bi giranî birîndar bûn.
Fermandarê Giştî yê Meclisa Leşkerî ya Girê Spî Riyad El Xelef bi bîr xist ku topên dewleta Tirk a dagirker bi awayekî hovane û bêserûber li ser navçeyê hatin barandin.
Fermandar El Xelef eşkere kir ji ber bombeyên neteqiyayî, jiyana şêniyan di metirsiyê de ye.
Dibe, di her kêliyê de, ev top biteqin û li qurbanên êrîşan ku heta niha, 6 kesan jiyana xwe ji dest daye û 16 jî birîndar bûne, qurbanên din zêde bibin û careke din ên ziyanê bibînin, sivîl bin.
