Cîgirê Hevserokatiya Rêveberiya Xweser Bedran Çiyakurd destnîşan kir ku arandinên niha, encama hevkariya hikumeta Şam û dewleta Tirk e. Çiyakurd anî ziman ku bi van arandinan hewl didin şerekî navxweyî di hundirê herêmê de bi pêş bixin. Lewra ji Rûsya xwest ku bi erka xwe rabe û dawî li vî rêbazê hikumetê bîne.
Çiyakurd destnîşan kir ku lihevkirineke siyasî di çarçoveya destûra Sûriyê de dê dawî li arandin û aloziyan bîne, lê eger hikumeta Şamê van arandinên xwe berdewam bike dê herêmên ku bi alîkariya Rûsyayê bi dest xistine jî, winda bike.
Herî dawî hikûmeta Şamê li Hesekê gel bi darê zorê kom kir û şandin ser bendên kontrolê yên Asayîşê.
Li gorî Cîgirê Hevserokatiya Rêveberiya Xweser Bedran Çiyakurd armanc arandin e û hewl dide berê herêmê ber bi aloziyeke berfireh ve bibe.
Çiyakurd destnîşan kir ku ev yek encama hevkariya hikumeta Şamê û dewleta Tirk e û got:
“Deshilata Şamê û ya dewleta Tirk a dagirker têkildar û hevkar in.
Ji milekî ve, dewleta Tirk gefan dixwe ji milê din ve jî hikumeta Şamê van kirinan pêk tîne.
Dixwazin ji çar aliyan ve êrişên xwe yên cur bi cur li ser van herêman bi pêş bixin.
Erdogan dixwaze hevkariya xwe li gel Bexda û Îranê li dijî deskeftiyên gelê Kurd, Şengal û Rêveberiya Xweser jî çêbike.”
Çiyakurd: Li hemberî êrîşan Rêveberiya Xweser wê parastina destkeftiyên xwe bike
Çiyakurd da zanîn ku hikumeta Şamê û hevalbendên wê bi rêbazên fitne û aloziyan dixwazin herêmê têk bibin, Rêveberiya Xweser ji planan, serwext û hişyar e, eger êrîşek çêbibe û bixwazin bi şêwazekî leşkerî aramiyê têk bibin, bêguman wê Rêveberiya Xweser parastina destkeftiyên xwe bike.
Çiyakurd: Divê Rûsya dawî li van arandinan bîne
Bedran Çiyakurd da zanîn ku ji ber hişmendiya hikumeta Şamê tu danûstandinên wan tune ne, lê bi Rûsyayê re hene û got:
“Divê Rûsya bi erka xwe rabe, dawî li van arandinan bîne. Ji ber ev arandin dê şerekî navxweyî di hundirê herêmê de bi pêş bixin.”
Cîgirê Hevserokatiya Rêveberiya Xweser bang li gelê Ereb kir ku bi rêbazên hikûmeta Şamê neyên xapandin, biratiya gelan û destkeftiyan biparêzin û bi gotina “Em ne alîgirên aloziyê ne, em aligirên çareseriya siyasî ya mayînde ne.” bi dawî kir.
