Piştî ragihandina hikûmeteke vuguhêz, aliyên Lîbî li ser budceyeke demkî heya 2 mehan ji bo derbaskirina qeyrana aborî li hev kir. Parlamenê jî da ku baweriyê bide hikûmeta nû, bang li tevahî parlamenteran kir ku beşdarî civîna taybet a li Tebriqê bibin. Tevî van gavan jî, hîna Tirkiyê binpêkirinan dike û ji bo wê Artêşa Niştimanî hişyarî da.
Şandeya NY ya li Lîbyayê ragihand ku aliyên li welêt li ser budceyeke yekkirî li hev kiriye ku bandoreke erênî li aboriyê bike, her wiha rê li ber yekkirina saziyên darayî veke.
Şandeyê da zanîn ku herdu aliyên Lîbî li ser budceya 2 mehan ji dêvla ya salekê li hev kiriye, da ku rê li ber desthilatan cîbicîker a yekkirî ya nû veke ku biryarê der barê budceya giştî ya sala 2021’ê de bistîne.
Parlamena Lîbî: Divê hemû parlamenter beşdarî civîna dana baweriyê bibin
Ji bo dana baweriyê jî, Serokê parlamena Lîbî Uqeyla Salih bang li hemû parlamenteran kir ku Duşema bê li baregeha parlamenê ya li bajarê Tebriqê, beşdarî rûniştineke şêwirkariyê ya taybet bibin.
Ev bang, hemwextî bangên yekkirina parlamen û derbaskirina pirsgirêkan tê kirin.
YE: Divê hikûmeta veguhêz di zûtirîn demê de ava bibe
YE jî bang li serokê hikûmeta Lîbî ya nû Ebdilhemîd El-Debîbe kir ku hikûmeta veguhêz di zûtirîn demê de ava bike.
Serokê şandeyê YE Jose Sabadell di vê derbarê de piştgiriya YE bo geşkirina aboriya Lîbyayê anî zimên.
El-Mismarî: Tirkiye dixwaze rewabûna hebûna xwe bi dest bixe
Tevî avabûna desthilateke dekmî ku welat heya hilbijartinên 24 Kanûna 2021’ê bi rê ve bibe, Lîbya hê jî digel hebûna hêzên biyanî, leşkerên Tirk û çeteyên bi ser wê ve, di nava gef û metirsiyan de ye.
Berdevkê artêşa Nîştimanî Ehmed El-Mismarî da xuyakirin ku Tirkiye bi ti awayî guh nade peymanên di navbera aliyên Lîbî de, her wiha hemû pîvanên navneteweyî binpê dike.
El-Mismarî teqez kir ku Tirkiye digel çeteyên xwe heya vê rojê li ser xaka Lîbyayê ne. Hebûna wê, gefê li peymanên aliyan dixwe.
