Hevserokên HDP’ê Pervîn Bûldan û Mîthat Sancar di çarçoveya kampanyaya xwe ya bi navê “Ji bo her kesî edalet” serdanên xwe ji bo aliyên siyasî li Tirkiyê û Bakurê Kurdistanê didomînin.
Hevserokên HDP’ê serdana Partiya Çepgir û Federasyona Komeleyên Elewiyan û Komeleya Alimên Olî yên Elewiyan kirin.
Hevseroka HDP’ê Pervîn Bûldan û heyeta pê re, di çarçoveya kampanya “Ji bo her kesî edalet” li Stenbolê serdana Federasyona Komeleyên Elewiyan û Komeleya Alimên Olî yên Elewiyan kirin.
Heyet ji aliyê Serokê Federasyona Komeleyên Elewiyan Pîr Celal Firat ve hate pêşwazîkirin.
Pîr Celal Firat kêfxweşiya xwe ya ji ber serdanê anî ziman û got ku qeyûmên li şaredariyan hatine danîn, kiryarên li dijî HDP’ê tên kirin, Elewiyan gelekî aciz dike.
Pervîn Bûldan: Edalet ji bo 82 milyon kesî lazim e
Hevseroka HDP’ê Pervîn Bûldan jî diyar kir ku divê li vî welatî atmosfereke welê bê afirandin ku bawerî û cihêrengî hemû karibin bi rengekî azad lê bijîn.
Pervîn Bûldan got:
“Ji bo ronîkirina komkujiyên li Dersim, Çorûm, Mereş û Sêwasê divê Komîsyona Heqîqetê bê avakirin.
Li dijî vê faşîzmê divê her kes rabe, têkoşînê hevpar bike û edaletê bi hev re were pêkanîn.
Edalet îro ji bo 82 milyon kesî lazim e.”
Hevserokê HDP’ê Mîthat Sancar: Li dijî polîtîkayên şer têkoşîna hevpar pêwîst e
Her wiha Hevserokê HDP’ê Mîthat Sancar û heyeta pê re di çarçoveya kampanya “Ji bo her kesî edalet” serdana Partiya Çepgir (Sol Partî) kir.
Mîthat Sancar piştî hevdîtinê daxuyanî da û diyar kir ku rojeva wan a sereke ew bû bê ka ew çawa dikarin tifaqa herî berfireh a demokrasiyê ava bikin, tifaqa ku ew behsê dikin ne ya hilbijartinê lê tifaqa demokrasiyê ye.
Sancar bang kir ku li dijî polîtîkayên şer divê têkoşîna hevpar a aştiyê were avakirin.
