TJA û Meclisa Jinan a HDP’ê ya Şirnexê dê di 26’ê sibatê de ji bo 8’ê Adarê li Hezexê çalakiyan destpê bikin. Jinan li navçeyên Cizîr û Hezexê belavok belav kirin û bangewaziya tevlîbûnê kirin. Çalakvana TJA’yê Songul Erden jî da zanîn ku ew ê têkoşînê veguherînin raperînê.
Tevgera Jinên Azad TJA’yê û Meclisa Jinan a HDP’ê a Şirnexê, dê di 26’ê sibatê de çalakiyên 8’ê Adarê Roja Jinan a Cîhanî bi dirûşma “Em li dijî qirkirina jinan jiyanê, li dijî tecrîdê azadiyê diparêzin” bidin destpêkirin.
Ji bo vê jî jinan li Hezexê serdana jinên di kargehan de dixebitin, kirin.
Parlamentera HDP’ê ya Şirnexê Nuran Îmîr, rêveberên HDP’ê ya Hezexê û gelek jin tevlî serdanê bûn.
Di serdanan de jinan, belavok û qurnefîl belavkirin û banga tevlîbûna startê kirin.
Her wiha li taxa Cûdî ya navçeya Cizîrê jî jinên TJA’yê serdana bazarê kirin û belavok belav kirin.
Songul Erden: Em ê têkoşînê veguherînin raperînê
Aktîvîsta TJA’yê û Hevşaredara HDP’ê ya Hezexê ku li şûna wê qeyûm hat tayînkirin Songûl Erden, bang li hemû jinan kir ku tevlî çalakiyan bibin.
Songul diyar kir ku jin di her aliyê de li dijî zilmê pêşengin û li ber xwe didin.
Songûl Erden di dawiyê de da zanîn ku ew ê têkoşînê veguherînin raperrînê û li hember zilmê dengê xwe bilind bikin.
TAJÊ bernameya xwe ya 8’ê Adarê eşkere kir
Li Başûrê Kurdistanê li Şengalê tevgera Azadiya Jinên Êzidî -TAJÊ jî bi boneya 8’ê adarê daxuyaniyek da.
TAJÊ diyar kir ku wê îsal 8’ê Adarê bi dirûşmeya “Bi têkoşîna jinên Êzidî azadiya rêbertî û xweseriya Şengale wê misoger bibe” pêşwazî bikin û got:
“Di dîrokê de gelek jinên pêşeng derketine ku li dijî bê dadî, bê mafî û bindestiyê têkoşîn dane.
Îro jinên Êzidî, şopdarên van jinên pêşengin û xwedî vîn in.”
Bernameya çalakiyên TAJÊ jî wiha ye.
Ji 26’ê sibatê şûnde, wê bi hemû pêkhateyên li Şengale û bi jinan re civîn û semîner bên lidarxstin.
Ji 1’e Adarê heta 3’ye Adarê li hemû kolan û gundan pankart bên daliqandin.
Ji 5’e Adarû heta 7’ê Adarê belavok bên belavkirin.
Roja 8’ê Adarê jî bi tevlîbûna hemû jinên Şengalê pîrozbahiyeke navendî wê bê lidarxistin.
