Dêwên cîhanê careke din li pêşberî hev rawestiyane.
Serokê DYA Joe Biden, serokê Rûsya Pûtîn bi ‘qatîl’ binavkir û got,
Ji ber destwerdana wî ya di hilbijartina DYA de, wê di demeke nêzîk de hesab bide.
Bi van gefên Biden re rublê Rûsî li pêşberî dolarê Amerîkî nirxê xwe winda kir.
Di navbera DYA û Rûsyayê de gefxwarin careke din despê kiriye.
Îstixbareta DYA rapora xwe ya derbarê destwerdana Rûsya di hilbijartina welat de eşkere kir.
Vê yekê careke din Waşîngton û Moskova li hev sor kiriye.
Serokê DYA Joe Biden di hevdîtina xwe ya yekem bi qenala ABC re, bersiva pirsên George Stephanopoulos da.
Biden naveroka axaftinên xwe ya telefonî ku di meha Çileyê li gel serokê Rûsya Vladimir Putin kirî de agahî da û got:
Pûtîn wê berdêla wê bide.
Me hevdîtinek dirêj pêk anî.
Min jêre got, te baş nasdikim û tu jî min baş nas diki.
Ger ev tişt werin piştrastkirin bila xwe ji tiştên ku bibe re amade bike.
Li ser pirsa “Wê demê hun Putîn nas dikin, li gorî we ew qatile?” Biden ev bersiv da:
Ez wisan difikirim.
Di raporê de hatibû gotin,
Serokê Rûsya Vladimir Putin di dema propagandaya hiltijartinê de, alîgiriya Donald Trump kiriye.
Bi eşkerebûna rapora îstixbatera DYA re, Moskova bertek nîşan da û ev yek red kir.
Rûsya jî daxwaza belgeyên şînber li ser tewambariyan dike.
Di daxuyaniya ku ji aliyê Berdevkê Kremlîn Dimitri Peskov ve hatî dayîn de wiha hate gotin:
Ev rapor neraste, bêbingeh û bê ku belgeyekê diyar bikin hatiye nivîsandin.
Piştî gotina Biden a wê Pûtîn ‘berdêl bide’ rubilê Rûsî li nava borsaya cîhanê qimetê xwe winda kir.
Di rapora Rêveberiya Îstixbareta Netewî ya DYA ku ji 15 rupelan hatî amadekirin de hatiye gotin, Rûsya li dijî namzetê Partiya Demokratan Joe Biden, propagandayên dijber pêk aniye.
Di raporê de hatiye gotin, her çiqasî ne di asta Rûsya û Îranê de jî be, lê Venezuela, Kuba û Hizbullah jî xwestine di encama hilbijartinê de destwerdanek li gorî xwe pêk bînin.
