Konferansa Brukselê ya ji bo Sûriyê, li ser dayîna 6.4 milyar dolar ji bo koçberên Sûrî yên li hundir û welatên derdorê li hev kir. Amerîka jî, dergehê Til Koçerê di nav de, banga vekirina dergehên mirovî yên ji sala 2020’an ve hatine girtin kir. Rûsya jî 3 dergehên alîkariyên mirovî yên li Idlib û Helebê girtin.
Di konferansa Brukselê ya ji bo Sûriyê de, welatên beşdar, li ser dayîna 6.4 milyar dolar weke alîkariya mirovî bo penaberî Sûrî li hev kir.
Konferans ji ber Coronayê bi rêya înternetê hat lidarxistin.
Di encama konferansê de, soz hat dayîn ku ji bo sala 2021’ê 4.4 milyar dolar, ji bo sala 2022’an jî 2 milyar dolar alîkarî bê dayîn.
Almanya ji bo koçberên li Sûriye û welatên cîran, soz da milyarek û 740 milyon dolarî bide.
Her wiha Amerîkayê jî soza dayîna 510 milyon Euro da.
Piraniya vê alîkariyê jî wê ji Libnan, Urdun, Tirkiye, Iraq û Misirê re bê dayîn.
Beriya niha NY daxwaza 10 milyar dolar ji bo koçberên Sûrî yên li hundir û welatên derdorê kiribû.
Amerîka banga vekirina dergehên mirovî dike
Ji bo derbasbûna van alîkariyan jî, Amerîka li ser zimanê wezîrê xwe yê derve Antony Blinken daxwaza vekirina dergehên mirovî yê ji sala 2020’an ve girtîne kir.
Blinken got:
“Divê em tiştekî ji bo xelkê bikin, ev berpirsyariya me ye, şerm e ku tiştekî nekin.”
Antony Blinken teqez kir ku tekane rêya dawîanîna li şerê li Sûriyê, çareseriya siyasî ye.
Blinken diyar kir ku “Rejîma Sûrî ti pêwîstiyên mirovî yên gelê Sûriyê pêk nayîne û divê civaka navdewletî vê yekê bike.”
Wezîrê derve yê Amerîkayê daxwaza vekirina dergehên Bab El-Selama yê bi Tirkiyê re û dergehê Til Koçer ê bi Iraqê re, ku ji sala 2020’an ve girtîne, kir.
Rûsya 3 dergehên mirovî li Idlib û Helebê girtin
Li aliyekî din, cîgirê serokê navenda lihevanîna Rûsî li Sûriyê Alexander Krbov, girtina 3 dergehên mirovî li Idlib û Helebê ragihand.
Li gorî Karbov, komên çete yên li herêmên di bin serweriya dewleta Tirk de, derdora van dergehan topbaran kirine û ji ber vê yekê ev dergeh heta vegera aramiyê tên girtin.
