Piştî rêveberiya nû ya Amerîka hat ser kar, Wezareta Karên Derve ya welat rapora xwe ya yekemîn a derbarê binpêkirinên mafê mirovan de eşkere kir.
Wezaretê diyar kir ku li Tirkiyê azadiya gotin, çapemenî û înternetê tê astengkirin.
Di raporê de îşaret bi derketina Tirkiyê ya ji Peymana Stenbolê jî hate kirin û hate gotin di nava salê de wê têkildarî tundiya li ser jinê jî raporek din were parvekirin.
Wezareta Karên Derve ya DYA têkildarî binpêkirinên mafê mirovan yê li sernserê cihanê belgeyan kom dike û bi raporekê jî bi raya giştî re parve dike.
Di rapora ku li ser malpera wezaretê hatî parvekirin de îşaret bi zehmetiyên ji ber vîrûsa corona û bandora wê ya li ser têkoşîna ji bo azadiyê jî hate kirin.
Wezaretê bi awayekî berfireh li ser azadiya li Tirkiyê rawestiyaye.
Wezaretê hilbijartina serokomariya Tirkiyê ya 2018’an bibîrxist û wiha got:
“Di dema hilbijartinê de yek ji namzetan di girtîgehê de bû.
Ev yek ji dide diyarkirin ku di hilbijartinê de şert û mercên wekhev nehatine destgirtin.”
Di raporê de êrîşa 25’ê Hezîranê ku dewleta Tirk li dijî başûrê kuridstanê pêk anî û 6 kes mirîn jî cih girt.
Her wiha di agahiyên ku spartî Rêxistina Çavdêriya Mafê Mirovan de jî hatiye gotin, 19’ê heman mehê jî ji ber êrîşên Tirkiyê 3 sivîl mirine.
Wezaretê diyar kiriye ku tewambariyên li dijî siyasetmedarên mixalîf didome.
Dozgeriya Tirkiyê têgîna terorîzm û parastina netewî pir berfireh digre dest.
Di serî de HDP, li dijî siyasetmedar, çalakger û kesên hikumetê rexne dikin ceza têne birîn.
Azadiya çapemeniyê jî cihê xwe di beşeke berfireh ya raporê de girt.
Ji bo vê yekê wezaretê ev tişt anî ziman:
Xwendekar, hozanvan û endamên komeleyan ji ber parvekirinên xwe yên li ser torên civakî bi cezayên lêpirsînê re rûbirû mane.
Wezaretê diyar kir ku piştî darbeya 2016’an û heta niha gelek rojnamevanên serbixwe hatine binçavkirin û xistine zindanê.
Li gorî Komîteya Parastina Rojnamevanan 37 û ya Estituya Çapemeniya Navnetewî 79 rojnamevan di girtîgehê de ne.
Piraniya van jî bi hinceta propagandaya PKK û Gulen hatine girtin.
Wezaret vê yekê jî piştrast dike ku piraniya dezgehên çapemeniyê di bin bandora partiya deshilat de ye û ji bo yên dijber jî gelek caran doz, gef û êrîşên fîzîkî pêk hatiye.
