Rêveberiya Xweser a Bakur û Rojhilatê Sûriyê diyar kir biryara girtina Deriyê Til Koçer bi zextên Rûsya û Tirkiyê a li ser Konseya Ewlekariyê hatiye erêkirin û da zanîn ev biryar ji bo 5 milyon kes ku li Bakur û Rojhilatê Sûriyê dijîn weke ceza ye.
Rêveberiyê daxwaz ji saziyên peywendîdar kir ku vê biryara neadil careke din li ber çavan derba bikin.
Di 9’ê Tîrmehê de, Konseya Ewlekariyê ya NY’yê, di çarçoveya biryarnameya hejamara 2585, mekanîzmeya derbaskirina alîkariyan ji bo Sûriyê bi rêya Dergeha Bab EL-Hewa ya ku dikeve bi serweriya dagirkeriya dewleta Tirk û çeteyên wê, heta salekê, erê kir.
Rêveberiya Xweser a Bakur û Rojhilatê Sûriyê bi daxuyaniyekê erêkirina biryarnameyê şermezar kir.
Rêveberiyê diyar kir ku ev biryar bi zexteke Rûsî -Tirkî li ser Konseyea Ewlekariyê, hatiye erêkirin.
Rêveberiyê da zanîn ku ev biryar weke ceza ye ji bo 5 milyon kes ku li Bakur û Rojhilatê Sûriyê jiyan dikin û tekez dike ku hin alî rewşa mirovî ya li Sûriyê bi rengekî siyasî bi kar tînin, ev yek jî ne li gorî berpirsyariyên Konseya Ewlekarî û NY ye.
Rêveberiyê destnîşan kir ku biryareke wiha li gel dorpêça li ser herêmê ji hemû aliyan ve, krîza mirovî aloztir dike .
Rêveberiyê da zanîn ku ev biryar rewşa li kampan ku bi deshezaran kes tê de hene aloztir dike, û tekez kir ku ew ne li dijî gihandina alîkariyên mirovî bo gelê Sûrî ne, lê ew dijî durûtiya pîvanên navneteweyî ne ku rewşa mirovî ya li herêmê dixe metirsiyê de
Rêveberiya Xweser: Hêzên navnetewî berpirsê vê biryara siyasî ne
Rêveberiyê tekez kir ku ev biryar rewşa mirovî li Sûriyê bi rengekî adil li ber çavan nagire û encamên vê biyara siyasî berpirsyariya saziyên navdewletî ne.
Rêveberiya Xweser a Bakur û Rojhilatê Sûriyê di dawiya daxuyaniya xwe de daxwaz ji saziyên peywendîdar kir ku ev biryara neadil careke din ber çavan re were derbaskirin û dubare tekez kir ku pêwîst e Dergeha Til Koçer bê vekirin
