Civîna NATO ya ku 3’ê rojan li Madrîdê dewam kir doh bi dawî bû.
Di civîna ku ji aliyê bloka rojhilatî ve ji nêz ve dihat şopandin de, Rûsya weke xeteriya herî mezin ya li ser welat hat destnîşankirin.
Welatên hevlbendên NATO diyar kirin ku heta 2030’an ewê lêçûneke bi qasî 20 milyar euro yê din li qada leşkerî xerç bikin.
Di nava şopandina bloka Rojhilatî de, lûtkeya lîderên NATO ya li paytexta Spanya Madrîdê bi dawî bû.
Di lûtkeya 32. a NATO yê de, xalên dijminahiya Rûsya derket asta herî pêş.
Li gor nûçeya ajansa dpa ya Almanî, lîderên welatên NATOyê di lûtkeya ku li Madrîdê hat lidarxistin de biryar dan ku heta dawiya sala 2030’ê 20 milyar euro din ji bo lêçûnên hevbeş ên Hevpeymaniyê veqetînin.
Li gorî nûçeyê, di lûtkeyê de li hev hat kirin ku her sal butçeya NATO’yê zêdetir bibe.
Hate hînbûn ku çavkaniyên zêde wê di serî de ji bo şandina kelûpelan ji bo aliyê rojhilatê NATO û ji bo binesaziya leşkerî, tetbîqat, ewlehiya sîber û pêşxistina hevkariyên bi welatên dost ên ku di nav Hevpeymaniya NATO’yê de ne, werin bikar anîn.
Endamên NATO’yê biryar dan ku her sal butçeya sivîl û leşkerî ya sala 2023’an ji sedî 10 û Bernameya berhênana Ewlekariyê ya NATOyê (NSIP) her sal ji sedî 25 zêde bikin.
Li gorî hesabên NATO’yê wê di navbera salên 2023-2030’an de 45 milyar euro bê veqetandin.
Li gorî nûçeya heman ajansê, Fransa li pişt wê yekê ye ku ev hejmar bi fermî bi raya giştî re neyên parvekirin.
Fransaya ku demeke dirêj li dijî zêdekirina butçeyê li ber xwe da, destnîşan kir ku divê ev agahî bi berfirehî bi raya giştî re neyê parvekirin.
Li gorî agahiyên ji derdorên NATO’yê hatin girtin, ev biryara butçeyê ya ku hat girtin jî wê di sala 2025’an de careke din ji ber çavan re derbas bibe.
Ji ber vê yekê Sekreterê Giştî yê NATOyê Jens Stoltenberg, di civîna çapemeniyê ya ku di dawiya lûtkeyê de li dar xist de, diyar kir ku ew xwe bi wê yekê têr dikin ku butçeya îttîfaqê “pir zêde bibe”.
