Rêveberiya Xweser bi boneya salvegera avabûna xwe daxuyaniyek da û soza rizgarkirina herêmên di bin dagirkeriya dewleta Tirk de da.
Rêvêberiyê bang li hemû gelên herêmê kir ku li dor saziyên Rêveberiya Xweser kom bibin da ku bêhtir bi bandor xebat û erkên xwe pêk bînin.
Bi boneya salvegera çaremîn a damezirandina xwe, Rêveberiya Xweser daxuyaniyek da raya giştî.
Rêveberiya Xweser ewil bal kişande ser destpêkirina bihara gelan a sala 2011’an û got:
“Di sala 2011’an de, tevgera gel li Sûriyê wek bertekek li hember polîtîkayên dewleta navendî serî rakir.
Piştî ku hêzên navneteweyî û herêmî li gorî berjewendiyên xwe destwerdan li krîza Sûriyê kirin û komên îslamî yên radîkal ji çar aliyên cîhanê derbas kirin, ev bû sedem ku tevgera gel ji rê, armanc û daxwazên xwe dûr bikeve.”
Rêveberiya Xweser destnîşan kir ku li ser wê bingehê jî Şoreşa 19’ê Tîrmeha 2012’an dest pê kir û wiha got:
“Hemû gel û pêkhateyên herêmê di hemû waran de ji bo xizmeta zarokên xwe, xwe birêxistin kir.
Tevî zor û zehmetiyên navxweyî û derve, zarokên herêmê li ser ragihandina Rêveberiya Xweser di 21’ê Çileya 2014’an de, li herêmên Cizîrê, Kobanê û Efrînê li hev kir û li dor kom bûn.
Ev bû bingeh û destpêka ragihandina projeya çareseriya demokratîk a ji bo Sûriyê.”
“Ev rêveberî li ser hevgirtina netewî û civakî hate avakirin”
Der barê armancên damezirandina rêveberiyê jî di daxuyaniyê de ev tişt hate gotin:
“Hewcedariya yekkirina kar û xebata her heft rêveberiyan hebû.
Lewma 6`ê Îlona 2018`an Rêveberiya Xweser a Bakur û Rojhilatê Sûriyê li bajarê Eyn Îsa bi sazûmaniyên heyî hat ragihandin.
Ev rêveberî li ser bingehên civakî û bingeha fikir û felsefeya neteweya demokartîk hate avakirin.”
Rêveberiya Xweser diyar kir di heman demê de ji bo hemû pirsgirêkên li Sûriyê û herêmê ev proje modeleke çareseriyê ye.
Di dewamê de Rêveberiyê îşaret bi sûcên dewleta Tirk a dagirker yên li dijî herêmê kir û sûcên wan yên li herêmên dagirkirî bi bîr xist.
Rêveberiya Xweser: Ji bo rizgarkirina herêmên dagirkirî em ê xebatên xwe zêdetir bikin
Rêveberiya Xweser soz da gelê herêmê ku ew ê ji bo rizgarkirina herêmên dagirkirî xebatên xwe zêdetir bike û got:
“Bi vê boneyê em Rêveberiya Xweser a Bakur û Rojhilatê Sûriyê sozê didin gelê xwe ku em ê rêya şehîdên xwe bişopînin, ewlehî û aramiya herêmê biparêzin.
Em ê destkeftiyên gelê herêmê bi dest xistine biparêzin da ku projeya Rêveberiya Xweser û saziyên wê yên sivîl û leşkerî ji êrişan were parastin.”
Rêveberiya Xweser: Divê gelê me li dora projeya Rêveberiya Xweser kom bibin
Rêveberiya Xweser bang li hemê gelê Sûriyê kir ku li derdora rêveberiyê kom bibin û bang li civata navneteweyî jî kir ku li hemberî êrişên Tirkiyê yên li ser herêmê erkên xwe yên exlaqî û qanûnî bi cih bînin.
