Navenda Ragihandin û Çapemeniyê ya YPG’ê bi daxuyaniyekî ragihand ku di êrişa dewleta tirk a dagirker ya di 16’ê Îlonê de li Eyn Îsa hevrêyên wan Fermandar Rojhat Karakoçan û Dogan Amanos şehîd bûne.
YGP’ê ji malbatên şehîdan û gel re sersaxî xwest û soza serkeftinê û pêkanîna armancên şehîdan da.
Di 16’ê Îlonê de dewleta tirk a dagirker bi balafirên şer êriş biribû ser Eyn Îsayê.
Navenda Ragihandin û Çapemeniyê ya Yekîneyên Parastina Gel (YPG) têkildarî mijarê daxuyaniyek nivîskî weşand.
YPG’ê ragihand di encama êrişa dewleta tirk a dagirker de Fermandar Rojhat Karakoçan û Dogan Amanos şehîd bûne.
YPG’ê diyar kir fermandar Rojhat Karakoçan ji bo gelê xwe bênavber têkoşiya û li ser kesayet û têkoşîna wî wiha got:
“Bi taybet di şerê ku li hember hovitiya DAIŞ`ê hat meşandin de, têkoşîneke bênavber û bêhempa da meşandin.
Dema ku hovitîya DAIŞ`ê tirseke mezin li ser mirovahiyê ava kiribû, fermandar Rojhat di şikandina vê tirsê de rolek dîrokî lîst.”
YPG’ê anî ziman qadên azad ku li hember hovitiya DAIŞ`ê hatibûn parastin, vê carê ji aliyê dewleta Tirk a dagirker ve hatin dagirkirin û wiha got:
“Dewleta Tirk weke ku tola binketina DAIŞ`ê bigire, êrişê destkftiyên şoreşa Rojava kir.
Hevalên me û gelê me yê ku di têkbirina DAIŞ’ê de bi roleke mezin rabûn bûn hedefa dewleta Tirk a dagirker.
Heval Rojhat jî wekî fermandarekî pêşeng bû hedefa êrişên dewleta Tirk a dagirker.”
YPG’ê têkildarî jiyan û têkoşîna Dogan Amanos jî ev tişt got:
“Hevrê Dogan di pêşxistina şoreşa Rojava de di her kêliya xwe yê têkoşinê de seknek kedkar û fedakar raber kir.
Ji bo ku gelê xwe û hevalên xwe biparêze, bi awayek fedayî şer kir û tekoşîn meşand.
Her wiha di serî de li berxwadana Efrînê, li hember êrişên dagirkeriyê jî her tim di eniya pêş de têkoşîn da meşandin û ji hevalên xwe re bû mînak.”
Di dawî de YGP’ê ji malbatên şehîdan û ji gel re sersaxiyê xwest û soza pêkanîna armancên wan û serkefitên da.
Nasnameyên hevalên me yên şehîd wiha ne:
- Nasnav: Rojhat Karakoçan
- Nav û Paşnav: Mehmet Gurbuz
- Navê Dayikê: Kumriye
- Navê Bav: Xeyrî
- Cih û Dîroka Jidayikbûnê: 1980, Karakoçan
- Cih û Dîroka Şehadetê: 16.09.2022, Eyn Îsa
- Nasnav: Dogan Amanos
- Nav û Paşnav: Mehmet Akyol
- Navê Dayikê: Îlva
- Navê Bav: Şerîf
- Cih û Dîroka Jidayikbûnê: 1979, Îskenderûn
- Cîh û Dîroka Şehadetê: 16.09.2022, Eyn Îsa