Piştî Almanya, Rêveberiya Amerîka jî teqez kir ku wê tankan bişîne Ukrayna.
Di dema ku Serokê Amerîkayê Biden diyar kiribû ku wê 31 tankên Abrams ji bo Kîevê bên şandin de, ji ber biryara şandina tankên Leopard spasiya Almanya kir.
Bi dijwarbûna demsala zivistanê re, li Ukrayna êdî şer derbasî pêvajoya çekên giran bûye.
Ji bo artêşa Ukrayna hîn zêdetir bikare xwe li pêşberî Rûsya bigre, daxwaza tankên Leopard yên Almanya kiribû.
Piştî Almanya, Dewletên Yekbûyî yên Amerîkayê (DYA) jî biryar da ku tankan bişîne Ukraynayê.
Serokê Amerîkayê Joe Biden di daxuyaniya xwe ya li Koşka Spî de diyar kir ku ew ê 31 tankên şer ên Abrams A1 bişîne Ukraynayê û wiha got:
“Armanca me ew e ku li dijî Rûsya, alîkariya ji bo parastina xaka Ukraynayê ye.
Biden diyar kir ku ev nayê wateya “gefa êrîşê” û ev tişt anî ziman:
“Radestkirina tankên şer beşek ji hewildanên Amerîka û hevalbendên wê ne ku alîkarîya Ukraynayê bikin ku serwerî û yekparçebûna axa xwe biparêze.”
Zelensky ji biryara Amerîkayê keyfxweş e
Serokomarê Ukraynayê Volodymyr Zelensky di peyama xwe ya li ser hesabê xwe yê Twitterê de kêfxweşiya xwe ji biryara Amerîkayê ya şandina tankên Abrams nîşan da.
Zelensky got:
“Spas ji bo gaveke din a bihêz bi biryara şandina Abrams bo Ukraynayê.
Em ji bo piştgiriya rêberiya Serokê Amerîkayê spas dikin!
Di rêya serketinê de ev gaveke girîng e.
Îro cîhana azad ji her demê bêtir yekgirtî ye:
Ji bo rizgarkirina Ukraynayê em bipêş ve diçin.”
Biden ji ber şandina tankên Leopard spasiya Almanya kir
Serokê Amerîka Biden ji ber şandina Almanya ya tankên Leopard spasiya Serokwezîrê Almanyayê Olaf Scholz kir.
Rêveberiya Almanya doh ragihandibû ku ew ê 14 tnakên Leopard 2 bişînin Ukrayna.
Ev yek piştî dudiliyeke dirêj hat.
Piştgiriya ji pênc welatan
Ji 5 welatên Ewropa piştevaniya bo Ukrayna
Scholz roja Çarşemê piştî nîvro bi têlefonê bi serokê Amerîka Joe Biden, serokê Fransa Emmanuel Macron, serokwezîrê Brîtanya Rishi Sunak û serokwezîrê Îtalya Giorgia Meloni re li ser piştgirîya navneteweyî ji Ukraynayê re axivî.
Berdevkê Hikûmeta Almanyayê ragihand, di civînê de rewşa ewlekariya Ukraynayê û piştgiriya ku ji bo şerê Ukraynayê li dijî êrîşa Rûsyayê tê dayîn, hatiye gotûbêjkirin.
Hate diyarkirin ku lîderên 5 welatên navborî li hev kirin ku di kordînasyona Euro-Atlantîk de piştgiriya leşkerî ya ji Ukraynayê bidomînin.
