Li paytexta Rûsya Moskow, maseyê bazara li ser xwîna gelê Sûrî hatiye danîn.
Dema civîna 4 alî ya navbera Şam, Enqere, Tehran û Moskow diyar bû.
Hikumeta Şamê ragihand ku civîna li ser asta cîgirên wezîrên Derve yên van welatan wê 3’ê Nîsanê pêk were.
Bi gotineke din, careke din li ser xwîna gelê Sûrî plana bazarên nû tên gerandin.
13 salin li ser xwîna vî gelî bazar têne kirin.
13 salin şer û aloziya li vî welatî bûye sedema ku êş û wêraniyeke zêde bi xwere bide çêkirin.
Niha li ser xwîna welatiyan careke din maseyên bazarê têne danîn.
Rûsya ji bo vê yekê amadekariyan dike.
Li ser xwîna Sûriyan bazarên nû: Civîna 4 alî
Pêşniyar hat kirin ku civîna çaralî ya li ser asta cîgirên wezîrên derve yên Rûsya, Tirkiye, Îran û Sûriyê roja duşemiyê 3’ê Nîsanê li paytexta Rûsya Moskowa were lidarxistin.
Berdevkê Komîteya Lihevhatinê yê hikumeta Şamê Omer Rehmûn li ser hesabê xwe yê Twitterê wiha got:
“Çavkaniyek taybet: Piştî peywendiyên zêde, civîna çaralî li ser asta cîgirên wezîrên derve yên Sûriye, Tirkiye, Îran û Rûsyayê wê li Moskowê were lidarxistin. Civîn wê 3’ê Nîsan roja Duşemê pêk were. Şam ji şert û mercên xwe tawîz neda.”
Ajansa nûçeyan a dewleta Rûsyayê RIA Novostî jî doh diyar kir ku cîgirên wezîrên her çar welatan wê di destpêka meha Nîsanê de li Moskowê bicivin.
Li gorî çapemeniya Tirkiyê wê civîna navborî 15-16’ê Adarê pêk hatiba.
Balkêşe di salvegera 12. a şerê li Sûrî de, Serokê Hikumeta Şamê Beşar El Esed ji nişka ve serdana Rûsyayê kir.
Esed di vê serdana xwe de piştevanî ji Serokê Rûsyayê Vladimir Putin girt.
Aliyan careke din di mijara Sûrî de hevkariya xwe anî ziman.
16’ê Adarê jî ajansa nûçeyan a Brîtanî Reutersê ragihandibû ku civîna cîgirên wezîrên karên derve ji ber pirsgirêkeke teknîkî pêk ne hatiye.
Erdogan di civîna koma partiya xwe ya li Meclisê ku 23’ê Mijdarê li dar xistî de got:
“Dibe ku bi Esed re hevdîtinek çêbibe.
Di siyasetê de xeyîdîn nabe.
Di dawiya dawî de emê gavan bi avêjin.”
Wezîrê Parastinê yê Tirkiyê Hulusî Akar û Serokê MÎTê Hakan Fîdan di dawiya Kanûna 2022’an da li Moskowayê bi hempîşeyên xwe yên Sûriyê re civiyan.
Herî dawî Erdogan û El Esed 2011’an bi rêya telefonê bi hevre axivîbûn.
Çavdêrên siyasî jî hewildanên Putin yên ji bo nêzkirina Erdogan û Esed bi hilbijartina li Tirkiyê ve girê didin.
Çavdêr difikirin ku bi vê rêyê Putin dixwaze destê erdogan di hilbijartinê de xurt bike.
