Koreya Bakur ragihand ku ji bo cara yekemîn moşekeke balîstîk a navparzemînê ya bi sotemeniya hişk bi serketî ceriband.
Rêveberiya Pyongyangê got: “Ev moşka herî bi hêz a ku me pêşxistiye.
Ji me re êrîşa bi çekên nukleerî hêsantir bûye.”
Koreya Bakur êdî rojane metirsiya hêza xwe dixe nava welatên cîran.
Herî dawî piştî moşeka doh hatî ceribandin, îro jî rêveberiya Pyongyangê moşekek din a navparzemînî ceriband.
Ev moşeka bi sotemeniya hişk, metirsiyeke hîn mezitin di nava civaka navdewletî de da avakirin.
Koreya Bakur yekem car moşekek bi sotemeniya hişk ceriband
Moşekên bi sotemeniya hişk ji moşekên bi sotemeniya şil xeternaktir têne dîtin.
Ji ber ku ev moşek di demeke pir kin de dikarin bên avêtin.
Di heman demê de hilanîn û veguheztina wan jî hêsantir in.
Koreya Bakur: Ceribandin bi serketî pêk hatiye
Koreya Bakur ragihand ku moşeka dawî ya ku ceribandine gaveke girîng bû ku bikaribe êrîşên nukleerî pêk bîne.
Wêneyên moşeka îro hatî ceribandin di medyaya dewletê de derketin.
Hate teqezkirin ku ceribandina moşekê bi “serkeftineke mezin” hatiye kirin û ev ceribandin dê “tirs û fikaran” bixe nava dijminan.
Ajansa fermî ya nûçeyan a welêt KCNA, diyar kir ku “bi moşeka Hwasongpho-18 wê sekna stratejîk a Koreya Bakur bê xurtkirin.”
Koreya Başûr îşaret bi wê yekê dike ku Koreya Bakur ji bo pêşdebirina teknolojiya sotemeniya xurt pêdiviya wan bi dema zêdetir heye.
Piştî ceribandina moşeka dawî ya Koreya Bakur, li girava Hokkaido ya Japonyayê jî alarm hat dayîn.
Koreya Bakur: Ji bo me êrişa bi çekên nukleerî hêsantir bûye
Lîderê Koreya Bakur Kim Jong-un îdia kir ku bi moşekên nû re wê ji bo welatên dijmin krîza ewlehiyê zêdetir bû.
Kim got,
“Divê dijminên me dev ji ramanên pûç berdin û dev ji kiryarên bêaqil berdin.”
Li herêmê tetbîqatên DYA-Koreya Başûr
Rêveberiya Pyongyan di wê baweriyê de ye ku tetbîqatên leşkerî yên hevpar ên Amerîka û Koreya Başûr, aloziya li herêmê zêde kiriye.
Ji ber vê sedemê di mehên dawî de lez da ceribandinên moşekan.
Moşekên Koreya Bakur ên navparzemînî yên naskirî bi sotemeniya şilin.
Tê zanîn ku lîderê Koreya Bakur Kim Jong-un dixwaze moşekên bi sotemeniya hişk ku ji bejahiyê yan jî ji keştiyên noqîvaniyî bên avêtin, çêbike.
Koreya Bakur di Kanûna Pêşîn de motorek sotemeniya hişk ya bi hêzek bilind ceriband.
Piştre, di merasîmeke leşkerî ya meha Sibatê hate lidarxistin de, wî îşaretên mûşekeke nû ya balîstîk a navparzemînî ya sotemeniya hişk da.
