Piştî daxwazên Ukrayna yên NATO ‘Derya Reş’ biparêze ji Moskow bertekên tund derket.
Hemwextî aloziya heyî Plonya wê balafirên Mig-29 bişîne Ukrayna.
Almanya jî bi rêya Çînê dixwaze zexta li ser Rûsyayê zêde bike.
Şerekî ku 15 mehin didome.
Û xwiya nake wê kengê bidawî bibe.
Rûsya bi hemû hêza xwe hewila pêkanîna daxwazên xwe yên li Ukrayna dike.
Rêveberiya Kîevê jî di her fersendê de hewara xwe digihîne welatên Rojava û NATO yê dor li Rûsya teng bikin.
Di vê çarçoveyê de gotinên Wezîrê Karê Derve yê Ukrayna Dmitro Kuleba yên bo Derya Reş Moskow bihêrs kir.
Kuleba ji Konferansa 1. a Ewlekariya Derya Reş a Platforma Navneteweyî ya Kirimê ku li paytexta Romanya Bukreşê pêk hat de peyamek vîdeo şand û got:
Serketina Ukrayna, serketina me hemûyan e.
Kuleba îşaret bi wê yekê kir ku geşedan nîşan dide ku ewlekariya li Derya Baltik û Derya Reş ji hev nayê dabeşkirin.
Kuleba daxwaz kir ku sîstemên parastina esmanî û moşekî yên Ukraynayê û hevalbendên NATOyê yên li Deryaya Reş û Baltikê bên yekkirin.
Li dijî van peyaman ji Moskow bertek derket.
Kremlîn bo NATO: Derya Reş wê ticarî nebe ya we
Berdevkê Kremlînê Dmitriy Peskov ragihand ku ev yek wê ticarî pêk neyê û got:
Derya Reş wê ticarî nebe deryayekî NATO yê.
Piştî erêkirina Almanya, Polonya wê balairên Mig-29 bişîne Ukrayna
Li aliyekî din, Almanyayê sewqiyata Polonyayê ya balafirên şer ên Mig-29 bo Ukraynayê pejirand.
Bi vî awayî Polonya wê bikaribe 5 balafirên şer ên din bişîne Ukraynayê.
Dema ku Almanyaya Federal di sala 1990 de bi Komara Demokratîk a Almanyayê re bû yek, wê 24 balafirên MiG-29 ji Almanyaya Rojhilat girt.
Wê demê ev balafir di nava balafirên şer ên herî modern ên cîhanê de bûn.
Berlîn di sala 2004’an de 22 balafir dabû Polonyayê.
Di encama qezayekê de yek ket û ya din jî li muzeyekê hat pêşandan.
Almanya bi rêya Çînê dixwaze zextên li ser Rûsya zêde bike
Li aliyekî din rewşa li Ukrayna di rojeva serdana Wezîra Karê Derve ya Almanyayê Annalena Baerbock ya Çînê de bû.
Di civîna Baerbock ya bi hempîşeyê xwe yê Çînê Çin Gang re, gavên ku ji bo bidawîkirina şerê Ukraynayê dikarin bên avêtin derketin pêş.
Civîn nêzî du saetan dewam kir.
Baerbock ji rêveberên Pekînê xwest ku ji bo bidawîkirina şer bandora xwe ya li ser Serokê Rûsyayê Vladimir Putin zêdetir bikar bîne.
Wezîra Alman ji Pekînê xwest ku alîkariya leşerî bû Moskowê pêk neyîne.
