Serokê YNK’ê Bafil Talebanî bi boneya salvegera 35. a Enfal peyamek belavkir û got; “Ji bo komkujiyên mîna enfalê carek dubare nebin, divê em yekîtiya xwe pêşbixin û dersek dîrokî jê derbixin. KNK’ê jî bi daxuyaniyek nivîskî qurbaniyên enfalê bi bîr anî û hate gotin; “Xizmên Enfaliyan ji xemsariya hikumet û parlamentoyê nerazîne”
Bi boneya salvegera Enfalê serokê Yekitiya Niştîmanî a Kurdistanê YNK’ê Bafil Talebanî peyamek belavkir.
Bafil Talebanî diyar kir enfal di dilê wan de birînek mezin û ruhê wan de jî êşek bê dawiye û ev peyam da:
“Enfal dersek dîrokî ye û divê em ji bîr nekin.
Ji bo komkujiyên mîna enfalê carek dubare nebin, divê em yekîtiya xwe pêşbixin û dersek dîrokî jê derbixin.
Li Kurdistanê hebûna hêz, partî û rengên cûda asayiye, lê divê em weke Kurd ji bîr nekin, qedera me yeke.
Ji bo vê jî divê parastina Kurdistan û bextewariya gel di ser hertiştî re be.
Her wiha Talebanî xemsariya Hikûmeta Başûr a ji bo darizandina berpirsiyaran jî carek din bi bîr xist û rexne kir.
KNK: Xizmên Enfaliyan ji xemsariya hikumet û parlamentoyê nerazîne
Kongreya Netewî ya Kurdistanê KNK’ê jî bi daxuyaniyek nivîskî qurbaniyên enfalê bi bîr anî.
KNK’ê bi bîr xist di dîrokê de Gelê Kurd rûbirûyî gelek sucên navnetewî ên weke jenosîd û qirkirinê hatine û got:
“Dagirkerên Kurdistanê ji bo tinekirina Gelê Kurd bi hemû curan hêza xwe bikaranîne.
Lê dawiya hemû dîktatoran hat û gelê me zindî maye. ”
Di dewama daxuyani xwe de KNK’ê bal kişande ser helwesta hikûmeta a ji bo daxwaza xizmên enfaliyan û ev yek got:
“Piştî 35 salan Hikumeta Iraq û Herêma Kurdistanê nekarîne pêşwaziya daxwaza jiyana xizmên qurbaniyên enfalê û herêmê bike.
Bi ti awayî tezmînata xizmên qurbaniyan nehatiye dayîn.
Li ser asta navnetewî jî nekarîne jenosîda Kurdistanê bikin dosyayek cîhanî û bi cîhanê bidin nasîn.
Hîn jî gorên enfaliyan nehetine vekirin, xizmên wan li benda hestiyên qurbaniyanin û nerazîne.
Divê sucê Enfalê bikeve bernameya xwendinê.”
KNK’ê di dawiyê de bang li hemû aliyên berprisyar kir ku, ji bo mijara enfalê stratejiyek nîştimanî danin û got:
“Xizmên Enfaliyan ji vê xemsariya hikumet û parlamentoyê nerazîne.
Divê hemû berpirsên Iraq û herêmê hêrsa xelkê cidî bigirin û ji bo çareseriya pirsgirêkan bixebitin.
Xizmên Enfaliyan: Em ê nehêlin berpirsên hikûmeta Başûr tevlî merasîmê bibin
