Rêveberiya Xweser a Şengalê bi daxuyaniyekê Encamnameya 5. a Kongreyê ku doh hate lidarxistin belav kir.
Di encamnameyê de Rêveberiyê diyar kir kongre bû bersiveke xurt li dijî êrîşên li ser Şengalê û got:
“Em hêvî dikin ev kongre bibe wesîleya tifaq, serkeftin û azadiya Şengalê”
Her wiha Rêveberiya Xweser a Şengalê banga vegerê li koçberan û xwedîderketina li Rêveberiyê kir.
Duh bi awayekî girseyî û bi coşek mezin Kongreya 5’emîn ya Rêveberiya Xweseriya Demokratîk ya Şengalê hate li darxistin.
Kongre bi hilbijartina hevserok û cîgirên hevserokan û endamên meclisê, kongre serkeftî encam bû.
Rêveberiya Xweser a Şengalê bi daxuyaniyekê Encamnameya 5’emîn Kongreyê belav kir.
Rêveberiyê diyar kir kongre bi beşdariya 450 delege û mêvanan bi awayeke serkeftî hate lidarxistin û spasiya hemû beşdarvanan kir.
Di encamnameyê de Rêveberiyê, pêvojoya 8 salan ku li ser meclisa avakar re derbas dibe bi bîr xist û ev tişt got:
“Ji Meclîsa Avaker heya roja me ya îro pêşengên pergala Rêveberiya Xweser hedef hatin girtin.
Ev êrîş ji Mam Zekî destpêkir heya Şehîd Merwan Bedel dewam kir.
Em beriya her tiştî bi minetdarî şehîdên xwe bibîr tînin ku em gîhandine vê rojê.”
“Rêveberiya Xweser a Şengalê zemîna avakirina Iraqa demokratîk e”
Rêveberiyê anî ziman wan Kongreya xwe de cara yekemin Hevpeymana Civakî ya Rêveberiya Xweser jî pêşkeş kir û wiha got:
“Ev hevpeyman, hedef û armancên me xurtir û zelaltir kiriye, îddia û baweriya me mezintir kiriye.
Rêveberiya Xweser a Şengalê, ne tenê pergaleke civakî û siyasî ye, her wiha pergala parastina hebûna civaka Êzidî û hemû pêkhateyên Şengalê ye.
Em dixwazin bi dewleta Iraqê re pirsgirêkên xwe bi riya diyalog û hevdîtinan, li ser esasê Şengala Xweser û Iraqa demokratik çareser bikin.
Rêveberiya Xweser a Şengalê zemîna avakirina Iraqa demokratîk e.”
“Kongreya me bû bersiveke xurt li dijî êrişên li ser Şengalê”
Di dewamê de encamnameyê de Rêveberiyê bal kişande ser êrişên li dijî Şengalê û ev tişt anî ziman:
“Dewleta tirk a dagirker bi hevkariya PDK’ê ji bo pergala Rêveberiya Xweser hilweşînin çi ji deste wan hate kirin.
Bi taybet di du salên dawî de di êrîşên xwe de ti sînorên siyasî, civakî û exlaqî nas nekirin.
PDK bi piştgiriya dewleta tirk a dagirker şev û roj li dijî Şengalê kar dike.
Bi taybet di demen dawî de hewl didin Peymana 9’ê Cotmehê careke din bixin meriyetê.
Ji bo van hedefên xwe yên qirêj, dixwazin Meclîsa Ruhanî û Saziya Mîrîtî jî bikar bînin.”
Rêveberiya Xweser a Şengalê diyar kir kongreya wan bû bersiveke xurt li dijî êrîşên li ser Şengalê û got:
“Em hêvî dikin ev kongre bibe wesîleya tifaq, serkeftin û azadiya Şengalê.
MXDŞ: Bila gel ji her demê zêdetir xwedî li Rêveberiya Xweser derkevin
Di dawiya encamnameyê de Rêveberiya Xweser a Şengalê banga vegerê li koçberan û xwedîderketina li Rêveberiyê kir.
