Piştî Şehbayê, saetên dayîna kehrebê li taxên Şêxmeqsûd û Eşrefiyê jî hatin kêmkirin.
Hişyarî hat dayîn ku eger dorpêça hikumeta Şamê dewam bike, dibe ku di rojên pêş de kehrebe li her du taxan bi temamî bê qutkirin.
Li taxên Şêxmeqsûd û Eşrefiyê yên Helebê ji ber dorpêça hikumeta Şamê û bidawîbûna sotemeniyê mayî, saetên dayîna kehrebê hatin kêmkirin.
Rojane 5 saetan kehrebe dihat dayîn, lê niha wê tenê 2 saetan kehrebe bê dayîn.
Şaredariya Gel îro diyar kir ku ji ber dorpêça hikumeta Şamê depoyê yedek ê mazotê xilas bûye û biryar da ku jeneratorên li herdu taxan rojê tenê du saetan bên xebitandin.
Berpirsê Komîteya Jenerator û Kehrebeyê ya girêdayî Şaredariya Gel Ehmed Celûsî destnîşan kir ku rewşa taxên Şêxmeqsûd û Eşrefiyê ji rewşa Şehbayê ne cuda ye.
Celûsî hişyarî da ku di dema pêş de eger dorpêç dewam bike, dibe ku sotemeniya ku pê jenerator tên xebitandin jî bi dawî bibe û kehrebe bi temamî qut bibe.
Hêjayî gotinê ye ku ji ber dorpêça hikumeta Şamê, ji 27’ê Nîsanê de kehrebe herêma Şehbayê qut e.
Hikumeta Şamê li herêma dorpêçkirî bendan zêde dike
Ne tenê dorpêç, Hikumeta Şamê rêbazên nû yên zexta li ser şêniyên taxên Şêxmeqsûd û Eşrefiyê yên Helebê dimeşîne.
Bendên kontrolê yên li derdora her du taxan zêde kirine, bi vê yekê hejmara bendên kontrolê dibin 8.
Xwendekarekî zanîngehê ku ji ber ewlehiyê navê xwe eşkere nekir got:
“Beriya 2 rojan ez di benda kontrolê ya Eşrefiyê re derbas bûm..
Ji ber hebûna bendekê ku 5 metreyan tenê ji benda din dûr e, matmayî mam.
Çekdarên li bendên kontrolê ew kontrol kir û telefona wî jî vekir.”
Heman xwendekarî got: “Hêzên li bendên kontrolê ne-xwedî exlaq in û gotinên nebaş dikin.
Heke tu li hemberî wan rabî dê tawanekê bi te ve girê bidin.
Ev tawan dibin sedem ku tu bi mehan di girtîgehê de bimînî.
Kesekî din ku ji ber ewlehiyê navê xwe eşkere nekir, dibêje:
Kiryarên hikumeta Şamê êdî nayên tehemulkirin.
Hêzên hikumeta Şamê rêbazên tirsandin û provakasyonan dimeşînin .
