Salek ji ser koça dawî ya Aysel Dogan re derbas bû.
Têkoşîna Aysel Dogan ji ya hevala wê Sakîne Cansiz ne cuda bû..
Aysel a ku her her cara dihat welatê xwe dihat girtin, têkoşîna hevpar a rêhevalên wê bû. Heta niha şopa riya wê ya aşîtiyê mayînde ye.
Jinên kurd jî perçeyekî dîrokê pêk tînin û bi têkoşînê bersivê didin qedexekirin û nenivîsandina dîroka xwe.
Ev dîroka têkoşînê jî keda bi hezaran jinan di nava xwe de dihewîne.
Aysel Dogan a hevala zarokatiyê ya Sakîne Cansiz bû bara wê ji vê têkoşînê hebû.
Aysel di 1953’an de li Dêrsimê ji dayik dibe.
Li Enqereyê Beşa Mamostetiya Perwerdeya Bedenê ya Zagîngeha Gaziyê xwend.
Piştî mezûn dibe li dibistana amadehiyê mamostetiyê dike û dest bi xebatên siyasî dike.
Di darbeya 12’ê Îlonê de 2 salan girtî dimîne.
1991’ê di hilbijartinên giştî de li Dêrsimê dibe namzeta serbixwe.
Tevî ku dengê herî zêde digire jî lê belê mazbataya wê nayê dayin.
Aysel li dijî tundiya dewletê diçe Ewropayê û li wir xebatên xwe yên têkoşîna azadiya kurd didomîne.
Ew endama Yekîtiya Civaka Kurdistanê (KCK) ye.
Û li ser banga Rêber Abdullah Ocalan bi 2’yemîn Koma Aştiyê di 2’yê Cotmeha 1999’an tê Tirkiyê.
Aysel çawa hat Tirkiyê hat girtin û 10 sal ceza lê hat birî.
Aysel li ser girtina xwe ya di dema Qasida Aştiyê de wiha got:
Me hewl da em bêjin em ji bo aştiyê amade ne. Em bi hêviyekê hatin. Hatina me ji bo aştiyê gaveke biçûk bû. 10 salan ez li girtîgehê mam. Ev bedeleke ji bo aştiyê dikare bê dayin. Ji bo azadî, xwişk û biratiyê dikare ev bedel bê dayin. Îro ji bo aştiyê heman bangê bikin ez ê dîsa bedel bidim.
Di 12’ê Îlona 2012’an de li dijî tecrîda li dijî Rêber Abdullah Ocalan dikeve greva birçîbûnê.
Ji ber nexweşiya wê ya pençeşêrê giran dibe derbarê wê de biryara tehliyekirinê tê dayin.
Loma jî careke din mecbûr dimîne derkeve derveyî welêt.
Li nexweşxaneya Kolnê ya Elmanyayê dema tedawiyê dibîne di 11’ê Gulana 2022’an de di 69 saliya xwe de jiyana xwe ji dest dide.
Cenazeyê Aysel li Dêrsimê hat definkirin.
Aysel wiha behsa Sakîne Cansiz kiribû:
“Dema em tevlî têkoşînê bûn me digot em ê tola Dêrsimê bigirin. Ji bo Sakîne digotin fermandareke xweşik e. Ez Sakîne dişibînim Çiyayê Zel. Çimkî Çiyayê Zel ji yên din cuda ye.”
