Hevserokê Daîreya Têkiliyên Derve ya Rêveberiya Xweser Bedran Çiya Kurd geşedanên dawîn ên têkildarî lihevkirin û dan û standinên rêveberiyê bi aliyên muxalefeta Sûriyê re li hundir û derve û hikumeta Şamê re eşkere kirin.
Hevserokê Daîreya Têkiliyên Derve ya Rêveberiya Xweser Bedran Çiya Kurd ku beşdarî Foruma Sûrî ya ji bo Şoreşa 19’ê Tîrmehê bû, bersiv da hin pirsên beşdaran.
Forum doh bi pêşengiya Partiya Yekîtiya Demokratîk (PYD) li Hesekê hat lidarxistin.
Çiya Kurd di axaftina xwe de bal kişand ser siyaseta ku ji destpêka aloziya Sûriyê de hatî meşandin û Şoreşa 19’ê Tîrmehê û ev tişt anî ziman:
“Tiştê li herêmê pêk hatiye bi saya hişmendî û zihniyeta rêveberiya vê şoreşê û pîvanên wê bû.
Berovajî aliyên din ên ku bûn amûrên girêdayî aliyên derve û şoreşa Sûriyê ji rêya wê derxistin.”
Bedran Çiya Kurd diyar kir ku ji bo peywendiyên bi muxalefeta demokratîk û nerm re ji beriya çend salan de xebatekî domdar heye û got:
“Projeyek ber bi avakirina eniyeke nîştimanî ya sûriyî û demokratîk heye.
Ji ber ku projeya me di bingeha xwe de projeyek sûriyî-nîştimanî ye.
Li gorî wê em li ser pêşxistina vê xebatî bi hemû aliyên Sûriyê re dixebitin.
Bi taybet aliyên ku bi pîvanên sereke ji bo parastina Sûriyê bawer in.
Ev xebat di qonaxên xwe yên dawîn de berdewam dike.
Ev xebat dikare di demsala payîzê de pêk were.”
Bedran Çiya Kurd: Armanca me guhertina siyaseta hundirîn û destûrê ye
Bedran Çiya Kurd anî ziman ku helwestên wan di aliyê siyasî de li hember “rejîma Sûriyê” diyar e û nayê guherandin û wiha got:
“Ji destpêka şoreşê de û heta niha me tevgera gel li Rojava da destpêkirin,
helwesta me diyar bû, ew jî pêkanîna guhertina giştî li Sûrî ye.
Em hewl nadin hikumê li Sûriyê biguherînin an jî biçin ser desthilatê.
Lê armanca me guhertina siyaseta hundirîn, guhertina destûrê ye.
Da ku ev destûr mafên hemû pêkhate û civakên Sûriyê misoger bike.”
Bedran Çiya Kurd: Bi rejîma Suriyê re lihevkirinek tune ye
Bedran Çiya Kurd da zanîn ku di vê pêvajoya heyî de, tu guhertin di asta dan û standin an lihevkirinên di navbera Rêveberiya Xweser û rejîmê de tune ne û got:
“Tu dan û standinên siyasî yan diyalog an lihevkirin heta niha tune ne.
Lê belê ji dema piştî dagirkirina Serêkaniyê de, di navbera Hêzên Sûriya Demokratîk û hêzên artêşa Sûriyê de bi rêya Rûsyayê tenê koordîne heye.
Lê asta koordîneyê derbas nake.
Em nikarin bêjin ku lihevkirina bi rejîma Sûriyê re heye.
Lê belê em her tim ji bo bidawîkirina êşa Sûriyan banga diyalogê li wan dikin.”
