Li Îsraîlê mijara reforma darazê û aloziya wê ji rojevê dernakeve.
Hemwextî xwepêşandanan, dest ji erk berdana hêzên leşkerî jî dewame.
Nêzî 830 leşkerên hêzên hewayî yên Îsraîlê li dijî reforma darazê dest ji erkê xwe berdan.
Piştî îstîfayên heyî Wezîrê Parastinê yê Îsraîlê Gallant, endamên Komîteya Derve û Ewlekariyê civîneke awarte li darxistin.
Li Îsraîlê îsrara Serokwezîr Benjamin Netanyahu ya reforma darazê welat xistiye nav aloziyeke mezin.
Rojane li seranserê welêt xwepêşandanên girseyî têne li darxistin û hêzên artêşê jî ji erkên xwe îstifa dikin.
Saziya Ragihandina Giştî ya Îsraîlê ragihand ku nêzî 830 leşkerên hêzên hewayî yên Îsraîlê ku di nav wan de bêrtirî 260 pîlot hene, dest ji erkê xwe berdane.
Rêveberiyên artêşê jî bi awayekî eşkere tînin ziman ku dest ji erk berdana di nava artêşê de, bandoreke nebaş li hêzên wan dike.
Serfermandarê Îsraîlê Herzî Halevî jî li ser hesabê xwe nivîsek parve kir û got:
“Eger artêşeke me ya bi hêz û temam nebe, wê welatekî me jî li vê herêmê nebe.”
Li dijî îstîfaya leşkeran civîna awarte
Hate ragihandinê ku Wezîrê Parastinê yê Îsraîlê Yaov Gallant, endamên Komîteya Derve û Ewlekariyê yên Knesset civîneke veşartî li darxistine.
Li gorî agahiyan mijara sereke ya civînê dest ji erk berdana artêşê bû.
Ev civîna awarte di medyayên Îsraîlê de, bûne mijara nîqaşê.
Li dijî reforma darazê amadekariya çalakiyên berfireh
Xuya ye ku aloziya li Îsraîl tenê bi artêşê re sînordar namîne.
Ji ber ku gelek sendîka jî li dijî biryara reforma darazê ne û ji bo lidarxistina çalakiyan amadekariyan dikin.
Ji aliyê din ve ji bo aboriya welat û rewşa ewlekariyê jî hişyarî hat dayîn.
Zanyarên Komîsyona Enerjiya Atomî ya Îsraîlê jî li dijî biryarê derketin
Hejmarek ji zanyarên payebilind ên Komîsyona Enerjiya Atomî ya Îsraîlê, weke nerazîbûna li hember reforma dadwerî gefa îstîfakirinê xwarin.
Medyayên Îsraîlê ragihandin di nava wan de bi dehan pisporên payebilind ên berpirsyarên pêşxistina kapasîteya nukleerî ya welat hene.
