“Duh Lozan îro Astana” bi vê gotinê Leyla Guven a ku li girtîgeha Jinan a Xarpêtê girtiye behsa Peymana Lozanê kir û got:”Li dijî gelê kurd şerê piralî hat destpêkirin, gelê kurd gelê herî rêxistinkirî yê Rojhilata Navîn e, wê tu car dest ji bo Lozanên nû neyê dayîn”.
Hevseroka Kongreya Civaka Demokratîk KCD’ê Leyla Guven a ku li girtîgeha Jinan a Xarpêtê girtiye nivîsek derbarê Pyemana Lozanê de nivîsand.
Leyla Guven da zanîn ku duh Lozan îro Astana ye û wiha anî ziman:
Pirsgirêka Kurd sed sale heye.
Gelê ku di şertên heyî de dihat gotin wê tune bibe, 100 sale berxwe dide û ev rewşek bi nirx e.
Bêguman hem li cîhan hem li Rojhilata Navîn di sedsalî de pir tişt guherî.
Bi başî nebaşî, êş û xweşî, hêrs û qederê wek çem têkoşîna me herikî û diherike.
Leyla diyar kir ku di hevsengiya Rojhilata Navîn û pirsgirêka kurd de 100 sal berê jî welatên aktor DYA, Rûsya, Îngîlîstan, Fransa, Almanya û welatên emperyalîst bûn û got:
Îro jî heman welat bi gur dixwin, bi berxikê digirîn.
Gelê Kurd êdî ji civaka xwezayî heta îro dîroka xwe dizane. Rêbertî dibêje ‘Dewlet tiştên li ser navê wan tên nivîsin hemûyan berovajî dikin û dixwînin’.
Ji ber rastî ji aliyê serdestan ve hatine berovajîkirin.
Ji ber vê jî gelê me tu carê bi agahiyên derew û şaş îtîbar nakin.
Leyla Guven: Li dijî gelê Kurd şerê piralî hat destpêkirin
Leyla Guven anî ziman ku di Peymana Lozanê de gelê Kurd li çar besan hat parçekirin.
Bi vê peymanê re şikestina herî mezin hat jiyîn. Konsepta pêş ketiye, kurdên li nav sînorê çar welatan mane, bi her awayî hatine asîmîlekirin. Ev rewş ewil bi ziman û çandê hatiye destpêkirin.
Ji ber ku kesên ziman û çanda xwe winda bikin her tiştê xwe winda dikin. Li dijî kurdan pir alî şer hatiye destpêkirin.
Leyla Guven: wê tu car dest ji bo Lozanên nû neyê dayîn
Di dawiyê de Leyla Guven got, gelê Kurd gelê herî rêxistinkirî yê Rojhilata Navîn e.
Ger ku dilê wan bixwaze êşên Gelê Kurd fêm bikin, neçarin statuya kurdan li her çar parçeyê Kurdsitanê nas bikin. Ev statu ne diyariya serdestane.
Ev deynê serdestan a ji bo malbata me ya bi Lozanê li çar parçeyan hatiye veqetandinê ye. An serkeftin an serkeftin.
