Belê Wezîrê Karê Derve yê rejîma Tirkiyê xwest êrişên xwe yên li ser xaka Iraqê rawa nîşan bide.
Li dijî vê Komîteya Têkiliyên Derve ya KCK’ê bertek nîşan da.
KCK’ê diyar kir ku dewleta qirker dixwaze dagirkeriya xwe ya li herêmê rawa bike û got,
Şertê destpêkê yê yekparebûna xaka Iraqê, bidawîkirina dagirkeriya Tirkiyê dibe.
Komîteya Têkiliyên Derve ya Koma Civakên Kurdistanê KCK’ê têkildarî serdana Wezîrê Karê Derve yê Dewleta Tirk a dagirker li Bexda û Hewlêrê daxuyaniyek weşand.
KCK’ê di serî de bal kişande ser banga Wezîrê Karên Derve yê Tirk Hakan Fîdan a ji bo naskirina PKK’ê wek rêxistineke Terorî û wiha got:
Wezîrê Karên Derve yê dewleta Tirk Hakan Fîdan dixwaze karên xwe yên qirêj ên dema serokatiya MÎT’ê vê carê di bin navê ‘dîplomasiyê’ de pêşkêş bike.
Wezîrê Karên Derve yê Tirk ku bi dagirkirina xaka Iraqê 100 qereqol, baregehên leşkerî û navendên MÎT’ê ava kiriye, bêyî ku li ber xwe bikeve qala yekparebûna xak û serweriya Iraqê dike.
KCK: Dewleta Tirk dixwaze dagirkeriyê bi rêya ‘dîplomasiyê’ mayinde bike
KCK’ê anî ziman dewleta tirk dixwaze dagirkeriya xwe ya li Kurdistanê û xaka Iraqê bi rêya ‘dîplomasiyê’ mayinde bike û wiha domand:
Hakan Fîdan ku bi komplogerî û provokatoriyê tê naskirin niha jî bi navê Tirkiyê karê ‘dîplomasiyê’ dike.
Hakan Fîdan ku bajarên Başûrê Kurdistanê bi ajanên MÎT’ê û çeteyên kujer dagirtiye û bi fermanan bi dehan mirov qetil kir, bêyî ji xwe fedî bike qala têkoşîna hevpar a li dijî ‘terorê’ dike.
KCK’ê destnîşan kir ku armanca esasî ya serdanê dagirkeriya Tirk a li Başûr û Iraqê nexin niqaşê û li şûna wê dewleta Iraqê jî tevlî siyaseta xwe ya qirkirina Kurdan bike
“Dewleta Tirk dixwaze bi piştgiriya PDK’ê tevgera me û Iraqê bîne dijberî hev”
Di dewamê de KCK’ê da zanîn dewleta Tirk a dagirker dixwaze bi piştgiriya PDK’ê tevgera wan û Iraqê bîne pêşberî hev û ev tişt anî ziman:
Ji ber wê jî kujerê Kurdan Fîdan dibêje, ‘divê Iraq PKK rêxistina terorê îlan bike’.
Rewşek ecêb e ku vê yekê li hemberî rûyê Wezîrê Derve yê Iraqê ku Kurd e, dibêje û rastî ti bertekê nayê.
KCK’ê bi lêv kir berpirsên dewlet û hikûmeta Iraqê û gelên welatparêz wê nekeve vê hîleyê û li hember wê rawestin.
KCK: Divê Iraq û Başûrê Kurdistanê nebe paşbaxçeyê MÎT û DAIŞ’ê
Komîteya Têkiliyên Derve ya KCK’ê ji hikûmetên herêmê û NY jî daxwaz kir ku dawî li êriş û dagirkeriya Tirk binîn û ev bang kir:
Divê destûr neyê dayîn ku dewleta Tirk di bin navê têkîliyên siyasî û bazirganiyê de Kerkûk, Mûsil, Hewlêr û Silêmaniyê bike paşbaxçeyê çeteyên DAÎŞ û MÎT’ê.
Şertê destpêkê û diyarker ê yekparebûna xak û serweriya Iraqê, bidawîkirina dagirkeriya Tirk a li ser xaka Iraqê ye.”
