Hevserokê PYD’ê Salih Muslim derbarê operesyona ‘Xurtkirina Ewlehiyê’ de axivî û diyar kir ku gelê herêmê bi hevgirtina xwe û sekna li rex hêzên xwe fitne û plan vala derxistin.
Muslim diyar kir wê gelên herêmê nehêlin ku DAIŞ careke din li herêmê serdest bibe.
Di 27’ê Tebaxa borî de QSD’ê operesyona ‘Xurtkirina Ewlehiyê’ li dijî şaneyên DAIŞ’ê û bazirganên hişbirê da destpêkirin.
Operasyon duh bi dawî bû û encamên wê bi raya giştî re hatin parvekirin.
Derbarê mijarê de Hevserokê PYD’ê Salih Muslim axivî û diyar kir ku li herêmê gelek bûyer qewimîbûn û gelek sûcên mîna kuştin, revandin û bazirganiyê hişbirê rûdan û got:
“Diviyabû li dijî wan pêngavek were destpêkirin. Bi vî awayî operasyon hat destpêkirin.”
Salih Muslim bal kişand ser kiryarên ku Ebû Xewla û kesên bi wî re kir û wiha axivî:
“Têkiliya van kesan bi çeteyên DAIŞ’ê, Dîfaa El Watanî re hebû û her wiha bazirganiya hişbirê jî dikirin ji lewra hatin girtin û ji erkên xwe hatin dûrxistin.”
”Armanc têkbirina rêveberiya vê herêmê û aramiya wê bû”
Muslim di dewama axafitna xwe de da zanîn ku piştî QSD’ê dest bi operasyonê kir gelek aliyan hewl dan fitneyan derxin, lê biserneketin û got.
“Armanca wan ew e ku rêveberiya vir hilweşînin û aramiya heyî têk bibin.
Jixwe di dawiya roja duyemîn a pêngavê de ji aliyê bakur ve jî êriş dest pê kirin.
Êrişên li ser Til Temir, Minbic û yên din hemû girêdayî hev in.
”Dewleta Tirk ji destpêkê ve li dijî modela demokratîkbûnê ye”
Muslim da xuyakirin ku li dijî fitneyên heyî helwesta gel xuya bû û hemû li pişta hêzên xwe sekinîn û wiha dewam kir,
“Pergal û modeleke demokratîk heye ku wan bi hevre ava kirine.
Ev model ji bo Sûriyeyê jî dikare bibe çareserî. Ji ber vê yekê dewleta Tirk ji destpêkê ve li dijî vê modela çareseriyê ye.
Hewl didin vê yekê asteng bikin. Dewleta Tirk 24 saetan hewl dide vê yekê pûç bike, lê nikare.
“Em ê nehêlin ku careke din DAIŞ li herêmê serwer bibe”
Hevserokê PYD’ê Salih Muslim di dawiyê de ev tişt anî ziman:
“Civakek çiqasî rêxistinbûna xwe xurt bike û gelê xwe çiqasî polîtîk bibe, ewqasî xweparastina xwe xurt dike.
Civaka me bi salan di nava sîstema BAAS û bi feraseteke şovenîst dihat birêvebirin.
Em ê vê biguherînin. Em ê nehêlin ku DAIŞ careke din li herêmê serdest bibe.
