Mehek di ser şerê navbera Îsraîl û Hemasê re derbas bû.
Lê ev meh qet bi hêsanî derbas nebû.
Di nava 24 saetên derbasbûyî de artêşa Îsraîlê 450 cih bombebaran kir.
Îsraîlê Xeza ji nîvê de qut kir.
18 saziyên NY jî gotin ‘êdî bes e’ û ji bo agirbesteke lezgîn a mirovî bang kirin.
Li Xezayê şev bêdeng derbas nabe.
Tarîbûna şevê, bi agirê ji bombeyên Îsraîlê derdikeve, cihê xwe ji ronahiyê re dihêle.
Artêşa Îsraîlê (IDF) di 24 saetên derbasbûyî de qereqolek Hemasê kontrol kirin.
Ev agahî di daxuyaniya fermî ya artêşa Îsraîlê de hate parvekirin.
Artêşê diyar kir ku hêzên wan di nava 24 saetên derbasbûyî de, li 450 cihan xistine.
Di daxuyaniyê de hate ragihandin ku di nava fermandarên Hemasê de yên hatin kuştin ‘şefê ewlekariyê yê taybet’ Cemal Mûsa jî heye.
Îsraîlê xXeza di nîvê de qut kir
Artêşa Îsraîlê eşkere kir ku hêzên wan ji başûrê bajarê Xezeyê ber bi Derya Spî ve pêşve çûne û Şerîda Xezayê ji nîvê de qut kirin e.
Hemas: Di êrîşên bi şev de herî kêm 200 kes mirin
Wezareta Tenduristiyê ya Hemasê jî diyar kir ku Îsraîlê bi şev bombardûmaneke giran li Xezeyê kir û herî kêm 200 kes hatin kuştin.
Wezaretê di peyama xwe de eşkere kir ku ev dane tenê ya li bjarê Xeza û Şerîda Xezayê ne.
Banga ‘Bakurê Xezayê biterikînin’
Berdevkê artêşa Îsraîlê Jonathan Conricus roja Duşemê bi daxuyahniyekê bang li sivîlan kir ku bakurê Xezeyê biterikînin.
Conricus got, “Bi vî rengî em ê karibin Hemasê keleh bi keleh, tabûr bi tabûr ji Şerîda Xezeyê biavêjin û bigihêjin armanca xwe.”
Saziyên Neteweyên Yekbûyî: Êdî bes e
Serokên saziyên sereke yên Neteweyên Yekbûyî (NY) jî bi daxuyaniyeke hevpar ku kêm caran dike, hêrsa xwe ya li hemberî kuştina sivîlan a li Xezayê anîn ziman.
Serokên rêxistinan têkildarî şerê navbera Îsraîl û Hemasê de ji bo ‘agirbesta mirovî ya lezgîn’ bang kirin.
Serokên saziyên NY’yê gotin,
“Nêzî meheke cîhan li pêşberî rewşa li Îsraîlê û Xaka Fîlîstînê ya di bin dagirkeriyê de ne, li pêşberî hejmara mirovên jiyana xwe ji dest dan, şoq bûye û bi rengekî matmayî dişopîne.”
Serokên 18 saziyan ku UNICEF, Bernameya Xurekê ya Cîhanê û Rêxistina Tenduristiyê ya Cîhanê jî di nav de ne, xemgîniya xwe ya ji ber zêdebûna hejmara miriyan a di şerê navbera Hemas û Îsraîlê de, anîn ziman.
Serokên 18 saziyan gotin,
“Pêwîstiya me bi agirbesteke lezgîn heye.
Bû sih roj.
Êdî bes e.
Divê dawî li vê yekê bê anîn.”
