Li Iraqê di navbera hêzên Amerîkayê û komên çekdar ên alîgirên Îranê de pevçûn didomin.
Rayedarên Iraqê li hemberî wan êrîşên domdar bertek nîşan didin û daxwaz dikin Amerîka leşkerên xwe ji Iraqê vekişîne.
Amerîka jî ji hikumeta Iraqê re têkîldarî du mijaran name şand.
Di vê nameyê de Amerîka hişyarî dide Iraqê ku dawî li van her du mijaran bîne, eger nebe dê bertekeke pir tund nîşan bidin.
Berdevkê Fermandeya Giştî ya Hêzên Çekdar ên Iraqê Yehya Resûl derbarê êrîşên Amerîkayê de axivî.
Yehya Resûl ragihand ku êrişên artêşa Amerîkayê û Heşdî Şabî bo ser navendên wan ên leşkerî, îradeyeke zelal nîşan dide ku ziyanê bigihîne ewlehî û aramiya Iraqê.
Fermandariya Navendî ya Amerîkayê (CENTCOM) di daxuyaniyekê de ragihand, hêzên wan sê navendên Heşdî Şabî û komên çekdar ên din ên Iraqê yên ku girêdayî Îranê ne, kirine armanc.
CENTCOM’ê da zanîn ku ev êrîş wek bersivdayîna êrîşên Tugayên Hizbullahê yên li dijî hedefên Amerîkayê hatin kirin, di nav de êrîşa li ser Baregeha Eyn el-Esed li rojavayê Iraqê.
Berdevk Yehya Resûl bang li civaka navneteweyî kir ku ‘ji bo piştgiriya aştî û ewlehiyê û nehiştina hemû binpêkirinên ku rastî îstîqrar û serweriya Iraqê dixe metirsiyê’ bigire ser xwe.
Her wiha Resûl anî ziman ku Iraq dê van operasyonan weke ‘kiryarên destdirêjiyê’ binirxîne.
Amerîka nameyek ji Iraqê re şand
Wezîrê Derve yê Iraqê tekez kir ku Amerîka nameyek ji hikûmeta Iraqê re şandiye û tê de hişyarî daye hikûmeta Iraqê derbarê du mijaran de.
Wezîrê Derve yê Iraqê Fûad Husên ragihand ku ew bi Balyoza Amerîka ya Iraqê Alina Romanowski re civiyane û nameyek girîng ji Amerîka radestî wî kirine û got:
“Peyam ji aliyê hikûmeta Amerîkayê ve ji hikûmeta navendî ya Iraqê re hatiye şandin û dê di pêşerojê de gav bên avêtin.”
Wezîrê Derve yê Iraqê têkildarî naveroka nameyê tu agahî eşkere nekir.
Amerîka têkîldarî du mijaran Iraqê hişyar kir
Derbarê naveroka nameya Amerîkayê ya ji bo Iraqê de jî medyaya Iraqê de wiha hat gotin:
“Di nameya Amerîkayê de du mijar hene ku yek ji wan hişyarî ji bo Amerîkayê ye derbarê mijara vekişîna hêzên wan ji Iraqê ye.
Ya duyemîn jî êrişên komên çekdar yên li ser baregehên leşkerî yên Amerîkî li Iraqê ye.”
Amerîka hişyarî da Iraqê ku dawî li van her du mijaran bîne, eger nebe dê bertekeke pir tund nîşan bidin.
