Amerîkayê ragihand ku moşeka Hûsiyên Yemenê weke “tehdîdeke nêzîk” hate diyarkirin, hatiye îmhakirin.
Husiyên li Yemenê jî ragihand ku wan li keştiyeke bazirganî ya Amerîkî ku ber bi benderên Îsraîlê ve diçû li Deryaya Sor xistin.
Li aliyê din Nûnerê Bilind ê Polîtîkayên Derve û Ewlekariyê yê Yekîtiya Ewropayê (YE) Josep Borrell derbarê erkdarkirina mîsyona deryayî de diyar kir ku wê 19’ê Sibatê were destpêkirin.
Amerîkayê ragihand ku moşeka Hûsiyên Yemenê weke “tehdîdeke nêzîk” hate diyarkirin, hatiye îmhakirin.
Di daxuyaniya Fermandariya Navendî ya Amerîkayê (CENTCOM) de hat ragihandin ku moşekeke Hûsiyan a ku amadekariya avêtinê dikir, hatiye xistin.
Di daxuyaniyê de wiha hat gotin:
“Hêzên Amerîkayê moşek li herêmên di bin kontrola Hûsiyan de li Yemenê tesbît kirin û diyar kirin ku ew ji bo balafirên Amerîkayê tehdîdeke nêzîk e.”
Hûsî: Me li Behra Sor li keştiya bazirganî ya Amerîkî xist
Husiyên Yemenê ragihand ku wan li keştiyeke bazirganî ya Amerîkî ku ber bi benderên Îsraîlê ve diçû li Deryaya Sor xistin.
Berdevkê Leşkerî yê Hûsiyan Yahya Serî diyar kir ku wan keştiyeke bazirganiyê ya Amerîkayê ku ber bi Îsraîlê ve diçû bi moşekan hedef girtin.
Serî diyar kir ku wan êrîş bi çend saetan piştî êrîşa li dijî keştiya deryayî ya Amerîkayê pêk anîne.
Serî bal kişand ser wê yekê ku ew ê dudilî nebin ji bo bersivdana êrişên Amerîka û Îngilîstanê.
Her wiha Serî teqez kir ku keştiyên Amerîkî û Îngîzî yên di Behra Sor re derbas dibin ji bo wan armancên rewa ne.
Parastina keştiyên li Behra Sor
Nûnerê Bilind ê Polîtîkayên Derve û Ewlekariyê yê Yekîtiya Ewropayê (YE) Josep Borrell derbarê mîsyona deryayî de axivî.
Josep Borrell ragihand ku mîsyona deryayî ya ku ji bo parastina keştiyên bazirganî yên li Behra Sor hatiye wezîfedarkirin, wê di 19’ê Sibatê de were destpêkirin.
Borrell piştî civîna nefermî ya wezîrên parastinê yên li Brukselê axivî û got:
“Ewlehiya deryayî ya li Behra Sor di hefteyên dawî de gelekî xirab bûye.
Em bi giranî xebatên li ser operasyoneke nû ya deryayî temam dikin da ku ji bo parastina keştiyên bazirganiyê bi ewlehî tevbigerin.”
Borell: Operasyon dê tenê ji bo armancên parastinê pêk were
Heta niha endamên Yekîtiya Ewropayê Belçîka, Fransa, Almanya, Yewnanîstan û Îtalya bi eşkereyî ragihandine ku ew ê beşdarî mîsyonê bibin.
Heya niha ne diyar e ku dê çend personelên leşkerî di nav mîsyonê de yan jî kapasîteya wan hebe.
