Tansiyona li Behra sor roj bi roj zêdetir dibe, Hûsiyan 6 mûşekên din avêtin Behra Sor.
Pentagonê diyar kir ew nafikirin bi Hûsiyan re bikevin nava şer, lê eger êriş bidomin, ew ê jî bersiva pêwîst bidin
Her wiha Serokê Hûsiyên Yemenê Abdulmelîk El-Hûsî jî hişyariya da Îsraîlê û alîgirên wan û got:
Eger êrîşên Îsraîlê yên li ser Xezeyê bidomin ew ê rageşiyê hîn zêdetir bikin û çi pêwîst bike seferber bikin
Rayedarekî Amerîkî anî ziman ku 6 mûşekên dijî keştî ji deverên Yemenê yên di bin kontrola Hûsî de avêtine Behra Sor.
Rayedarekî Amerîkî ku nexwest navê xwe eşkere bike got:
Hêzên deryayî yên Amerîkî herî kêm yek ji wan moşekan roja Sêşemê xistin xwarê, lê yên din ketin deryayê.
Êrîşên Hûsiyan piştî artêşa Amerîkî ragihand ku wan li dijî du keştiyên bêmirov ên bi teqemeniyan barkirî yê Husiyan armanc girtine, pêk hatin.
Fermandarîya Navendî ya Amerîka (CENTCOM) got: “Ew keştî “metirsîyeke nêzîk li ser keştîyên hêzên deryayî yên Amerîkî û keştîyên bazirganî yên li herêmê ne”.
Pentagon: Eger êriş bidomin emê bersiva pêwîst bidin
Têkildarî mijarê Sekreterê Giştî yê Pentagonê General Pat Ryder ku ji rojnamevanan re axivî wiha got:
“Di êrîşên roja Yekşemê de ji aliyê hêzên wan ve gelek mûşekên Hûsiyan hatine xistin
Em bi Hûsiyan re ne di şer de ne.
Em nafikirin bi Hûsiyan re şer bikin, lê eger êriş bidomin, em ê jî li ser têkbirin û qelskirina wan dewam bikin.”
Husiyan hişyariya da Îsraîlê û alîgirên wan
Ji aliyê din ve Hûsiyan jî diyar kirin ku êrîşên wan ên li Behra Sor ji bo hevgirtinê bi gelê Xezayê re ye.
Û destnîşan kirin ku tevî êrîşên DYA û Îngilîstanê jî wê êrîşên xwe bidomînin.
Berpirsê Hûsiyan Mihemed el-Buhaîtî di daxuyaniyekê de li ser platforma medyaya civakî got:
“Şerê me li dijî Îsraîlê exlaqî ye ji ber ku armanca me rawestandina tawanên jenosîdê li Xezayê ye”
Serokê Hûsiyên Yemenê Abdulmelîk El-Hûsî jî di kanala televîzyonê ya Hûsiyan de hişyariya da Îsraîlê û alîgirên wan.
Ebdulmelîk El-Hûsî da zanîn eger êrîşên Îsraîlê yên li ser Xezeyê bidomin ew ê rageşiyê hîn zêdetir bikin û çi pêwîst bike seferber bikin.
