Şerê li Xezayê 136 roj li pey xwe hişt, hê jî rojane bi dehan kes dimirin û birîndar dibin.
Di nava 24 seetan de 107 kesên din hatin kuştin.
Îsraîl jî dîroka operasyona bejahî ya li dijî Refahê diyar kir.
Îsraîlê ragihand ger ku heta destpêkirina rojiyê ango 10’ê Adarê dîl girtî neyên berdan ew ê dest bi êrişê bikin.
Şerê li Xezayê yê di navbera Hemas û Îsraîlê de 136 roj li pey xwe hişt.
Di şer de rojane bi dehan kes dimirin û birîndar dibin.
Wezareta Tenduristiyê ya Xezayê bîlançoya şer ya dawiyê eşkere kir.
Wezaretê ragihand di nava 24 seetên dawî de 107 kes hatine kuştin û 145 jî birîndar bûn.
Ji ber şer heta niha hejmara kuştiyan derket 29 hezar 92 kes û zêdeyî 69 hezar kes jî birîndar bûne.
Li başûrê Xezayê leşkerekî Îsraîlê hate kuştin
Artêşa Îsraîlê ragihand di şerê li başûrê Xezayê de leşkerekî wan yê din hate kuştin.
Artêşê ragihand leşkerê ku hatiye kuştin ji ekîba sîwaneyê ango pereşûtê ye û hûrguliyên derbarê kuştina wî de eşkere nekir.
Îsraîl’ê dema êrişa li ser Refahê diyar kir
Li aliyê din artêşa Îsraîlê ku demeke amadekariyên operasyona bejahî ya li dijî herêma Refahê ya Xezayê dike, dema destpêkirina operasyonê diyar kir.
Endamê Kabîneya Şer a Îsraîlê Benny Gantz duh têkildarî mijarê daxuyanî da.
Gantz: Ger dîl girtî neyên berdan beriya rojiyê em ê dest bi êrişê bikin
Gantz heta 10’ê Adarê ango beriya ku rojiya remezanê dest pê bike, dem da Hemasê ku dîl girtiyên di destê xwe de berde û wiha got,
“Divê cîhan û rêveberên Hemasê bizanin, ger heta meha remezanê dîl girtî venegerin malên xwe artêşa Îsraîlê wê li dijî Refahê êrişa bejahî dest pê bike.”
Her wiha Gantz diyar kir ji bo ku sivîl kêm bên kuştin ew bi hevkarên xwe yên Amerîkî û Misrî re danûstandinan dikin da ku bi rengekî kordîneyî wan derxin.
Gallant: Me hêzên Hemasê ên li Xan Yunus ji hev xistin
Wezîrê Parastinê yê Îsraîlê Yoav Gallant jî duh bi daxuyaniyekê eşkere kir ku wan hêzên Hemasê yên li Xan Yunus ji hev xistine û anî ziman ku li qadê rêveberên wan jî nemane.
Gallant da zanîn ku li Xan Yunus 200 kes teslîm bûne û got,
“Mirovên ku di destên wan de RPG û çek hene li rastiyê serxwet bûn û dest ji şer berdan. Ji ber têgihiştin ku çarenûsa wan yan mirine yan jî çek danîne.”
Gallan diyar kir di destê Hemasê de tenê tabûrên li Refahê hêzên li kampên Xezayê mane û got,
“Li Refahê 4 û li navenda Xezayê jî 2 tabûrên wan mane. Êdî kes nema ku alîkariya wan bike. Ne Îranî û ne jî alîkariyên navnetewî. Heta ku 134 dîl girtî di destê wan de bin mafê me yê seknê nîne.”
