Duh li ser pêkanîna agirbestê û berdana dîl girtiyan li Dewhayê civîna çar alî pêk hat.
Amerîkayê têkildarî mijarê diyar kir ku li ser xalên sereke lihevkirine.
Neteweyên Yekbuyî jî careke din derbarê operasyona li dijî Refahê de hişyarî kir.
Ji bo pêkanîna agirbestê û bi hev guhertina dîl girtiyên di navbera Hemas û Îsraîlê de duh li Dewhayê civîn hate lidarxistin.
Şandeyên Amerîka, Îsraîl, Misir û Qeterê beşdarî civînê bûn.
Şêwirmendê Ewlekariya Netewî yê Amerîkayê Jake Sullivan têkildarî mijarê axivî.
Amerîka: Çar welatan ji bo agirbestê li ser mijarên sereke li hev kirin
Sullivan got,
“Misir, Amerîka, Îsraîl û Qeterê li ser pêkanîna agirbesta li Xezayê û berdana dîl girtiyan li ser mijarê sereke li hev kirin.
Lê ev li hev kirin hê di asta danûstandinan de ye. Divê Misir û Qeter bi Hemasê re hevdîtinan bikin.”
NY: Êrişa Îsraîlê ya li dijî Refahê wê alîkariyên me asteng bike
Neteweyên Yekbuyî li dijî operasyona Îsraîlê ya li dijî Refahê ku amadekariya wê tê kirin, daxuyanî da.
Sekreterê Giştî yê Neteweyên Yekbuyî Antonyo Guterres têkildarî mijarê di rûniştina 55’an ya Konseya Mafên Mirovan ya NY de axivî.
Guterres diyar kir êrişa Îsraîlê ya li dijî Refahê wê ji bo zêdeyî milyonek mirovên li wê herêmê rê li ber rewşeke kambax veke û alîkariyên ji bo herêmê jî asteng bike.
Her wiha Guterres da zanîn ti tiştek nikare êrişên Hemasê yên 7’ê Cotmeha 2023’an ên li dijî Îsraîlê mafdar bibîne û got,
“Ti tiştek nikare cezakirina gelê Filistînê jî mafdar bibîne. Li Xezayê jin û zarok jî di navê de bi deh hezaran sivîl hatin kuştin.
Bajarê Refahê bingeha derbaskirina alîkariyên mirovî ye. Êrişeke li dijî vê herêmê wê rê li ber encamên giran veke.”
Sekreterê Giştî yê NY careke din banga pêk anîna agirbestê û bedana dîl girtiyan kir.
Qral Abdullah û Mehmûd Ebas li Ammanê hevdîtin pêk anîn
Li gorî daxuyaniya Ofîsa Qraliyeta Urdinê, Qral Abdullah û Serokê Rêveberiya Filistînê Mehmûd Ebas li paytext Ammanê hevdîtin pêk anîn.
Hat diyar kirin di hevdîtinê de li ser rewşa Xezayê û Şerîa Rojava niqaş hatiye kirin.
Hat ragihandin di civînê Qralê Urdinê Abdullah derbarê êrişên Îsraîlê yên li ser Xezayê de hişyarî kiriye û diyar kiriye berdewamkirina êrişan wê rê li ber belavbûna şer veke û gotiye,
Divê li Xezayê agirbesteke lezgîn bê ragihandin û ji bo parastina sivîlan xebat bên meşandin,”
Erebistan wê 6 meh destûra rûniştinê bide Filistiniyan
Li aliyê din Erebistana Siûdî ji bo welatiyên Filistinî yên ku ji bo Umrê serdan kiribûn û nikarin vegerin, 6 meh mafê rûniştinê bide wan.
Li ser mijarê Wezareta Karên Derve ya Erebistanê daxuyanî da û got,
“Ji bo welatiyên Xezayê yên ku serdana Umrê kirine û ji ber êrişên Îsraîlê nikarin vegerin 6 meh destûra rûniştinê hate dayîn.”
