Li ser rewşa Xezayê careke din li navenda Neteweyên Yekbuyî civîn hate lidarxistin.
Di civînê de nûnerên saziyên alîkariya mirovî yên NY derbarê rewşa xirab ya li Xezayê de hişyarî kirin.
Nûnerên saziyên alîkariyê ên NY û tevahiya nûnerên welatên endam yên ku beşdarî civînê bûn xwestin tavilê agirbest pêk were.
Erebistana Siûdî jî banga rawestandina operasyonên leşkerî yên li Xezayê kir.
Bi nêzîkbûna meha remezanê re di asta navnetewî de niqaşên li ser agirbesta li Xezayê ya di navbera Hemas û Îsraîlê de zêde dibin.
Tevî ku heta niha gelek civîn li ser vê mijarê hatine lidarxistin jî lê encameke şênber derneketiye.
Duh Konseya Ewlekariyê ya Neteweyên Yekbuyî li New Yorkê ji bo Xezayê careke din civiya.
Hat diyar kirin Amerîka di civînê de pêşnûmeyeke derbarê agirbesta li Xezayê, berdana dîl girtiyan û astengkirina operasyona Îsraîlê ya li dijî Refahê pêşkêş kiriye.
Rayedarên NY: Li Xezayê 579 hezar kes li ber xelayê ne
Hat ragihandin tevahiya nûnerên welatên endam yên ku beşdarî civîna li ser Xezayê bûne xwestine tavilê agirbest pêk were.
Gelek nûnerên saziyên alîkariyê yên Neteweyên Yekbuyî jî li civînê têkildarî rewşa xirab ya li Xezayê hişyarî kirin û fikarên xwe ji endamê konseyê re ragihandin.
Nûnerên saziyên alîkariyê ragihandin ku ji çaran yek nûfusa Xezayê ango 579 hezar kes li ber xelayê ne û diyar kirin di mijara derbaskirina alîkariyên mirovî de astengiyên mezin hene.
Hat diyar kirin ji bo çareseriya vê pirsgirêkê divê di navbera Hemas û Îsraîlê de agirbest pêk were.
Erebistanê banga rawestandina êrişên li ser Xezayê kir
Duh di civîna Desteya Wezîran ya li paytexta Erebistana Siûdî, Riyadê de rewşa li Xezayê jî hate niqaşkirin.
Di civînê de hate diyar kirin operasyonên leşkerî yên li dijî Xezayê gefê li ewlekarî û aştiya navnetewî dixwe banga rawestandina êrişan hate kirin.
Hewldanên pêkanîna agirbestê yên Misir û Qeterê didomin
Li aliyê din xebatên navbeynkariyê yên Misir û Qeterê ên ji bo pêkanîna peymana agirbestê ya ji bo Xezayê didomin.
Serok-komarê Misirê Ebdulfetah Sîsî duh bi Wezîrê Parastinê, Fermandarê Giştî yê Artêşê û fermandarên din yên artêşê re li hev civiyan.
Hat ragihandin di civînê de tevî gelek mijarên din rewşa şerê li Xezayê jî hatiye niqaşkirin û hatiye diyar kirin, Misir ji bo pêkanîna agirbestê û bi dawîkirina şer xebatên xwe didomîne.
