Konseya Rêveber a Kongreya Neteweyî ya Kurdistanê-KNK bi boneya 44’emîn salvegera komkujiya Kurdên Feylî daxuyaniyeke da û got:
“Piştî 21 salan ji hilweşîna rejîma Baasê li Iraqê hîna jî gelek dosye û mafên Kurdên Feylî yên bi ispat nayên pêkanîn.
Divê hikumeta Federal a Iraqê ji bo vegerandina mafên Kurdên Feylî hewlên xwe zêde bikeDivê aliyên Kurd pirsgirêka Kurdên Feylî weke pirsgirêka xwe bibînin”
Di sala 1980’î de ji aliyê rejîma Baasê ve zêdetirî 600 hezar Kurdên Feylî bi awayekî zordarî nasnameya Iraqê ji wan hat standin, ji ax û welatê xwe hatin derxistin û sirgûnî Îranê hatin kirin.
Piştre dest bi ser mal û milkên wan de hatibû girtin û zêdetirî 20 hezar ciwanên Kurdên Feylî hatibûn binçavkirin, girtin û windakirin ku heta îro jî çarenûsa wan ne diyar e.
Konseya Rêveber a Kongreya Neteweyî ya Kurdistanê-KNK bi boneya 44’emîn salvegera komkujiya Kurdên Feylî daxuyaniyeke da û qurbaniyên komkujiyê bi bîr anî.
KNK: Divê hikumeta Federal a Iraqê ji bo vegerandina mafên Kurdên Feylî hewlên xwe zêde bike
KNK’ê diyar kir ku Kurdên Feylî wek beşeke neteweya Kurd a resen her tim di nav xebat û têkoşîna tevgerên neteweyî yên gelê Kurd de cihê xwe girtine û got:
“Tawanên ku li dijî Kurdên Feylî hatibûn kirin, ji hêla Dadgeha Bilind a Tawanan a Iraqê ve wek jenosîd hatibin naskirin.
Lê tevî vê yekê û piştî 21 salan ji hilweşîna rejîma Baasê li Iraqê hîna jî gelek dosye û mafên Kurdên Feylî yên bi ispat nayên pêkanîn derbarê wan de gav nayê avîtin.
Bi vê boneyê em daxwaz ji Hikûmeta Federal a Iraqê dikin ku ji bo vegerandina mafên wan ên rewa û zeftkirî hewlên xwe zêdetir bike.
Her wiha herêmên Feyliyan bixe nav bernameya avakirin û geşepêdanê ku niha Hikûmet cih bi cih dike û ji bo xizmetguzarî û geşepêdanên curbicur û çareserkirina pirsgirêka avê projeyan pêşbixîne.”
KNK: Divê aliyên Kurd pirsgirêka kurdên feylî weke pirsgirêka xwe bibînin
KNK’ê anî ziman ku hêzên Kurdî yên li başûrê Kurdistanê bi awayekî adil li hember civaka Kurdên Feylî miamele nekirine û wiha domand:
“Berovajî, li gorî berjewendiyên xwe bi Kurdên Feylî danûstandin kirine û bûne sedema parçebûnê di nav civaka wan de.
Ji bo vegerandina mafên Kurdên Feylî, pêwîstî bi yekrêziya navxweyî ya Feyliyan heye.
Her wiha hêz û aliyên Kurd divê di nav dewleta federal a Iraqê de van pirsgirêkan wek pirsgirêkên xwe bibînin û li hember wê yekhelwest bin.”
