Li Curnê Reş li ser îtiraza AKP’ê biryar hate dayin ku hilbijartin jinûve bê kirin.
Desthila AKP’ê li navçeyên Curnê Reş, Xelfetî yên Rihayê bi fena dixwaze serkeftina DEM Partiyê xesb bike.
Li ser daxwaza AKP hilbijartinên Curnê Reş û Xelfetî wê ji nû ve bê kirin.
Li navçeya Kerboran Mêrdînê jî li ser îtîraza AKP’ê biryar hat dayîn ku deng ji nû ve bê hejmartin.
Her wiha li Sêwregê jî Lijneya Hilbijartinê piştî îtiraza Partiya Yenîden Refahê hilbijartin betal kir.
Li Tirkiye û Bakurê Kurdistanê fenê desthilata AKP’ê yên li dijî serkeftina Dem Partiyê didome û li dijî wê jî DEM Partî li berxwe dide.
AKP’ê bi taybetî li hin deverên ku DEM Partî lê bi ser ket îtiraz kir û hewl dide encamên hilbijartinê biguherîne.
Li navçeya Curnê Reş a Rihayê li gel hilbijêrên veguhestî û bikaranîna dengên blok jî DEM Partiyê bi ser ket.
Lê li ser îtiraza AKP’ê Desteya Hilbijartinê ya Bilind a dagirkeriya Tirkiyê biryar da ku hilbijartin ji nû ve bê kirin.
Li gorî vê yekê wê hilbijartin di 2’ê Hezîrana 2024’an de pêk were.
Garîp Yeşîl: Em ê Curnê Reş careke din qezenç bikin
Hevşaredarê Curnê Reş Garîp Yeşîl rewşa li Curnê Reş nirxand û got:
“Mejiyê AKP’ê ji guhertin û veguhertinê ditirse, lewma naxwaze Curnê Reş ji me re bihêle.
Pêvajoya hiqûqî bi rengekî rast nameşe, li gorî dilê AKP’ê dimeşe.
Bi wergirtina Curnê Reş em ê têkoşîna demokratîk dewam bikin.”
DEM Partî ji bo Xelfetiyê serî li YSK’ê da
Li aliyekî din li ser daxwaza AKP’ê hilbijartina navçeya Xelfetî jî hate betalkirin.
DEM Partî ji bo betalkirina biryara nûkirina hilbijartina Xelfetiyê serî Lijneya Bilind a Hilbijartinê-YSK da.
Li Kerboranê deng wê ji nû ve bên hejmartin
Ne tenê li Xelfetiyê ev ne neheqî pêk hat, her wiha li navçeya Kerboran a Mêrdînê jî lijneya Hilbijartinê li ser îtîraza AKP’ê biryara jinûve hejmartina dengên Kerboranê yên ku ji aliyê DEM Partiyê ve hatibûn bi dest xistin da.
Hat diyarkirin ku dê îro li Kerboranê deng ji nû ve bên hejmartin.
DEM Partî li benda encama serlêdana Bedlîsê ye
Li Bedlîsê jî vê carê dema ku DEM Partî ji bo deng jinûve bên hilbijartin îtîraz kir, hat redkirin.
Li ser vê yekê DEN Partî serî li YSK’ê da û niha li benda biryara YSK’ê ne.
DEM Partî: Îtîrazên AKP’ê tên qebûlkirin lê yên me nayên qebûlkirin
Têkildarî mijarê daxuyanî hate dayîn û tê de wiha hat gotin:
“Dizîna îradeya gel bêexlaqî û sûc e.
Îtîrazên AKP’ê tên qebûlkirin lê yên me nayên qebûlkirin.”
Li Sêwregê hilbijartin hat betalkirin
Li Sêwregê jî hatibû îdiakirin ku namzetê AKP’ê bi 64 rayan bi ser ketiye.
Lê piştî îtiraza Partiya Yenîden Refahê-YRP, biryar hat dayin ku hilbijartin bê nûkirin.
Li ser îtîraza AKP’ê, hilbijartina li navçeyên Curnê Reş û Xelfetiyê wê bên dubarekirin
