Endamê Konseya Rêveber a KCK’ê Mûstafa Karasû li ser tecrîda giran a Îmraliyê û xwedî lêderketina Rêber Apo axivî û got;
“Ev xwedîderketin wê mirovahiyê hembêz bike.
Hingî wê CPT jî helwesteke rast nîşan bide.
DMME jî wê bi rola xwe rabe, yan jî rola xwe bi bîr bîne.
Û Rêber Apo jî bi têkoşîneke bi vî rengî azad bibe.”
Endamê Konseya Rêveber a KCK’ê Mûstafa Karasû beşdarî bernameya Medya Haber TV bû û rojev nirxand.
Mûstafa Karasû diyar kir ku li ser Rêber Apo tecrîdek tam tê meşandin û got:
“Li ser Rêbertî 9 sal in tecrîdeke tam heye.
Eger tecrîda li ser Rêbertî di vê astê de tê meşandin bêguman Ewropa jî ji vê yekê berpirsyar e.
Dadgeha Mafên Mirovan a Ewropayê DMME Konseya Ewropa, Komîteya Pêşîgirtina li Êşkenceyê CPT berpirsyar e.
Wan ev sîstem ava kirin.
Ev sîstem di navbera Ewropa, Dewletên Yekbûyî yên Emerîka DYE û Tirkiyê de hate avakirin.”
“Daxuyanî nîşan dide ku CPT zehmetiyan dikişîne”
Mûstafa Karasû di domdariya nirxandinê bahsa daxuyaniya CPT jî kir û wiha domand:
“CPT’ê daxuyanî da, ji xwe Omer Ocalan jî, parêzer jî çûn.
CPT Gotin, ‘Em nikarin daxuyaniyê bidin.
Eger Tirkiye destûrê bide em dikarin daxuyaniyê bidin’ yan jî ‘Eger li Îmraliyê binpêkirina mafên mirovan hebe hingî DMME berpirsyar e’.
Ev îzahat nîşan dide ku zehmetiyê dikişînin.
Temam li hemberî CPT têkoşîna hiqûqê dikare bê meşandin, lê belê ji bo encam bê wergirtin xwedîderketina li Rêbertî hîn bêhtir girîng e.”
Mûstafa Karasû: Zehmet e ku Rêberekî Jin xwedî lê derdikevin li Zindanê bê hiştin
Mûstafa Karasû xwedî derketina li Rêber Apo ya ji aliyê gel ve nirxand û wiha anî ziman:
“Xwedîderketineke gelekî mezin heye.
Xwedîderketina li Rêbertî wê hîn mezin bibe.
Jin ji xwe wê hîn bêhtir xwedî li Rêbertî derkevin.
Rêberekî ku jin di vê astê de bi xurtî xwedî lê derdikeve, zehmet e ku li zindanê bê hiştin.
Şikandina zexta li ser Rêbertî bi xwedîderketina jinan dibe.”
Mûstafa Karasû:”1’ê Gulanê roja pêşvebirina têkoşîna hevpar a gelê Kurd e”
Mûstafa Karasû diyar kir ku divê 1’ê Gulanê weke despêka demeke nû bê nirxandin û wiha bi dawî kir:
“Divê êdî zext, mêtingeriya ji 12’ê Îlonê û vir ve hatiye afirandin bê şikandin û weke pêvajoyeke nû ya ku xurtkirina têkoşîna demokrasî û azadiyê ya Tirkiyeyê bê nirxandin.
Divê 1’ê Gulana îsal weke destpêka demeke nû bê nirxandin.
Li ser vê bingehê ez bang li gelê Kurd dikim ku qadên 1’ê Gulanê dagire, bi gelên Tirkiyê re, bi karker û kedkarên Tirkiyeyê re û bi jinan re têkoşînê mezin bike.”
