Şerê Hemas û Îsraîlê li deriyê Refahê berdewam dike.
Hemasê bi hevkariya Tevgera Cîhada Îslamî ya Qudsê bi hawanan hêzên Îsraîlê yên li deriyê sînor ê Refahê bi cîh bûne armanc girtin.
Her wiha Wezîrê Karên Derve ya Amerîkayê diyar kir ku hejmara sivîlên di êrîşa Îsraîlê ya li Xezayê de mirine ji hejmara çekdarên Hamasê yên hatine kuştin zêdetir e.
Li aliyê din Wezîrê Derve yê Îngîlîstanê David Cameron anî ziman ku qedexekirina hinartina çekan a Îngîlistanê bo Îsraîlê dê Hamasê bihêz bike.
Di xeta sînorê Refahê de êrîş û pevçûnên Hemas û Îsraîlê zêde dibe.
Îsraîl bi balafiran Refahê bombebaran dike û Hemas jî leşkerên Îsraîlê yên li ber deriyê Refahê bi cîh bûne bi moşekan dike armanc.
Hemas li deriyê sînor ê Refahê hêzên Îsraîlê kir armanc
Baskê Leşkerî yê Hemasê Tugayên Îzzeddîn El-Qessam ragihand ku bi hevkariya baskê leşkerî yê Tevgera Cîhada Îslamî Qudsê hêzên Îsraîlê yên li deriyê sînor ê Refahê bi cîh bûne bi topên hawanê xistin.
Di daxuyaniya Hemasê ya li ser Telegramê wiha hat gotin:
“Mucahidên El-Qessam û Mucahidên Quds Seriyê li Deriyê Sînor ê Refahê bi topên hawanê yên giran li çeperên dijmin xistin.”
Tûgayên Qassam duh jî ragihandibûn ku li Deriyê Sînor ê Refahê bi topên hawanê li leşkerên Îsraîlê û wesayîtên zirxî xistine.
Herzî Halevî: Me nekarî pêşî li êrîşên 7’ê Cotmehê bigirin
Sererkanê Giştî yê Îsraîlê Herzî Halevî di daxuyaniya xwe de diyar kir ku artêşê nekariye pêşî li êrîşên 7’ê Cotmehê bigire û berpirsyariya vê yekê jî hilgirtiye ser milê xwe.
Herzî Halevî got:
“Ez berpirsyariya sernexistina artêşa Îsraîlê ya di 7’ê Cotmehê de di erka xwe ya parastina welatiyên Îsraîlê de girtiye ser milê xwe û her roj giraniya vê yekê li ser milê xwe hîs dikim.”
Sererkanê artêşê herwiha teqez kir, ku Îsraîl bi biryar e şerê li Şerîda Xezayê temam bike û got:
“Her çiqas haya me ji bedelê hebe jî em bi biryar in ku wezîfeyê biqedînin.
“Dema ku dijminên me li dijî me rabin, em ê amade bin û bi tundî bersivê bidin her hewlek ku zirarê bide me.”
Blinken: Îsraîl ji hemasê zêdetir sivîlan kuştin
Wezîrê Karên Derve yê Amerîkayê Antony Blinken diyar kir ku hejmara sivîlên di êrîşa Îsraîlê ya li Xezayê de mirine ji hejmara çekdarên Hamasê yên hatine kuştin zêdetir e.
Blinken got:
“Dikare were nirxandin ku kiryarên ku bi erkên Îsraîlê yên li gorî hiqûqa mirovî ya navneteweyî re li hev nakin hene.”
Blinken her wiha anî ziman ku Amerîka ji bo baştir parastina sivîlan bike,zextê li ser operasyona li Refahê didomîne.
Cameron: Rawestandina firotina çekan bo Îsraîlê dê Hemasê bihêz bike
Wezîrê Derve yê Îngîlîstanê David Cameron anî ziman ku qedexekirina hinartina çekan a Îngîlistanê bo Îsraîlê dê Hamasê bihêz bike.
Lê Cameron diyar kir ku ji ber nebûna plana parastina bi sed hezaran sivîlên li herêmê, ew piştgirî nadin operasyona Refahê.
Cameron da zanîn ku ji sedî 1’ê çekên Îsraîlê ji Ingilîstanê tên û ev çek jixwe bi pergaleke hişk a lîsansê tên kontrolkirin.
