KONGRA STAR û Fermandariya Giştî ya Yekîneyên Parastina jin YPJ fermana Şengalê bi bîr anî û got:
Xilaskirina jinên Êzidî ji destê çeteyan û vegera wan li Şengalê tolhildana herî mezin a ji DAIŞ’ê ye.
TEV-DEMê jî bang li raya giştî û Iraqê kir ku îradeya xelkê Şengalê nas bike
Fermandariya Giştî ya Yekîneyên Parastina Jin YPJ’ê bi daxuyniyekê salvegera 10. a fermana Şengalê bi bîr anî.
YPJ’ê di serî de balkişand ser berxwedana ku li Şengalê hat raberkirin û got:
Ji bo ku pêşî li vê komkujiyê were girtin, Şervanên YPJ-YPG bi wêrekî û ruheke fedayî derbasî çiyayên Şengalê bûn.
Korîdora mirovî vekirin û tevî gerîlayên Kurdistanê pêşî li komkujiyeke mezin hate girtin.
YPJ’ê da zanîn ku wan di salvegera komkujiya Şengalê de zarokek û 2 jinên Êzîdî yên din rizgar kirin û wiha got:
“Di salvegera komkujiya Şengalê de, xilaskirina van jinan û vegera wan li Şengalê, ji bo me tolhildana herî mezin a ji DAÎŞ’ê ye. Wek YPJ’ê rizgarkirina jinên Êzidî yên ku hîna jî çarenûsa wan ne diyare, rizgarkirina wan erka me ya sereke û exlaqî ye.”
Kongra Star: Dengê jinên Êzidî dengê me hemûyan e
Her wiha Meclisa Kongra Star jî ji bo salvegera fermanê daxuyaniyek da.
Kongra Star diyar kir ku gerf û metirsî li ser gelê Kurd hê bi dawî nebûye û ev tişt anî ziman:
Dewleta Tirk hema bêje her roj bi her cûre teknîka şer hewl dide xelkê me yê Êzidî qir bike.
Bi destê PDK’ê jî dagirkerî li başûr zêde dibe.
Kongra Star destnîşan kir ku heta qirkirina jinê weke sûcê mirovahiyê neyê qebûlkirin têkoşînek pê bawer û teqez nayê kirin û ev peyam da:
“Em weke şoreşa jin piştgiryê didin jinên Şengal, efganistan ,rojhilat û hemû jinên têkoşîna azadiya didin meşandin. Dengê jinên Êzîdî dengê me hemuyan e. Em bang li hemû jinên azadîxwaz dikin bi hev re têkoşîna xwe xurt bikin.”
TEV-DEM’ê banga pejirandina îradeya Êzidiyan kir
Bi heman wesîleyê Tevgera Civaka Kurd TEV-DEM jî bi daxuyaniyekê şehîdên komkujiya Êzîdiyan bi bîr anî.
TEV-DEM’ê anî ziman divê Hikûmeta Iraqê ji bêdengiya xwe derkeve û çareseriyekê li ser esasê nirx û pîvanên netewa demokratîk yê Êzîdiyan bibîne.
Di vê çarçoveyê de TEV-DEM ev bang li raya giştî û Iraqê kir:
“Em bang li hemû hêzên netewî û siyasî yên Kurdistanî û Iraqê her wiha Rêxistinên sivîl û mafan dikin ku fişarê li PDK’ê bikin da ku destwerdanê li vîn û îradeya Êzîdiyan neke.”
