Endama Konseya Serokatiya Giştî ya KCK’ê Sozdar Avesta diyar kir ku metirsiya qirkirinê ya li ser Êzidiyan dewam dike.
Sozdar Avesta banga misogerkirina xweseriyê kir û got:
“Em careke din bang li dewleta Iraqê dikin;
Tişta divê bê kirin, naskirina statuya Şengalê ji aliyê dewleta Iraqê ve ye.”
Endama Konseya Serokatiya Giştî ya KCK’ê Sozdar Avesta di salvegera 10’an a fermana 3’ê Tebaxa 2014’an axivî.
Sozdar Avesta şehîdên fermanê bibîr anî û got:
“Ez dayikên şehîdan, jinên berxwedêr, hêzên ku di her demê de bi rola xwe rabûn YBŞ, YJŞ, Asayîşa Êzidxanê û hemû gelê me bi dil û can silav dikim.
Têkoşîna wan ji dil û can pîroz dikim. Nehiştin ku ev ferman bigihêje armanca xwe.”
Sozdar Avesta planên fermanê Şengalê wiha anî ziman;
“Di 1’ê Hezîrana 2014’an de li paytexta Urdun Ammanê hêzên ku DAÎŞ ava kirin, civînek lidar xistin. Di vê civînê de Siûdî, Qatar, dewleta Tirk û malbata Barzanî-PDK ên xayin tevlî bûn. Li gorî biryarên li Ammanê hatin girtin xeta Şengal-Mûsilê, wê radestî DAÎŞ’ê bihata kirin. Ev biryar bi rengekî fermî di nava xwe de nîqaş kirin û biryar li ser dan.”
Sozdar Avesta: Plana dagirkeriyê ji civîna ammanê despêkê kir
Bi domdarî Sozadar Avesta plana li ser xeta Rojava û Başûr wiha anî ziman;
“Di bihara 2014’an de malbata Barzanî li ser sînorê ku dagirkeran di navbera Rojava û Başûr de çêkirine xendek kola. Ev yek destpêka plana Ammanê bû. Xwestin civaka Êzidî qir bike. Ji aliyekî ve xwest xelkê Êzidî bixe bin kontrola xwe û baweriya wan tine bike, li aliyê din jî xwest ku Şoreşa Rojava ku hîn nû bû bifetisîne.”
Sozdar Avesta: Îxaneta PDK’ê niha ji berdewam dike
Sozdar Avesta diyar kir ku îxaneta PDK’ê di roja me ya îro de jî berdewam dike û got:
“Di 3’ê Tebaxê de dema ku êrişên DAÎŞ’ê destpê kirin, PDK’ê gel di nava lepên çeteyan de hişt û reviya. Çekên gel kom kirin, li pêşiya gel bûn asteng û bi rengekî bê rûmet reviyan. PDK vê siyaseta xwe hîn jî dewam dike. Dewleta Iraqê û malbata Barzanî civaka Êzidî neparastin.”
Sozdar Avesta: Tişta divê bê kirin, naskirina statuya Şengalê ji aliyê dewleta Iraqê ve ye
Endama Konseya Serokatiya Giştî ya KCK’ê Sozdar Avesta herî dawî ev bang kir:
“Bersiva herî hêja ya ku di vê demê de ji fermanê re bê dayin, misogerkirina rêveberiya xweser e. Bi vê wesîleyê em careke din bang li dewleta Iraqê dikin; Tişta divê bê kirin, naskirina statuya Şengalê ji aliyê dewleta Iraqê ve ye.”
KCK û KJK’ê bi boneya salvegera 10’emîn a fermana 3’ê Tebaxa 2014’an daxuynî dan
