Wezîrê Karên Derve yê Îranê Elî Baqirî anî ziman ku welatê wî dê di dema ‘guncaw’ de bersiva kuştina lîderê Hamasê Îsmaîl Heniye bide.
Baqirî li Erebistana Siûdî axivî, ku Rêxistina Hevkariya Îslamî (IOC) ji bo gotûbêjkirina bersiva muxtemel a Îranê ya li hember suîkastê dicive.
Amerîka diyar kir ku ew hêvî dikin ku endamên Rêxistina Hevkariya Îslamî dê Îranê li hember “gavên ku dê pevçûn gurtir bike” hişyar bikin.
Piştî ku Haniye hefteya borî li Tehranê hat kuştin rageşiya li herêmê zêde bû.
Di dema ku Îran û hevalbendên wê Îsraîl sûcdar dikin, Îsraîl hîn ti daxuyanî nedaye.
Rêxistina Hevkariya Îslamî li ser daxwaza rayedarên Îranî û Filistînî li bajarê Cîdde yê Erebistana Siûdî civiya.
Wezîrê Karên Derve yê Îranê Alî Baqirî anî ziman ku ew hêvî dikin ku endamên Rêxistina Hevkariya Îslamî piştgirî bidin bersiva Îranê ya li hember suîkastê.
Baqerî her wiha got:
“Ev pêngava Îranê ne tenê parastina serwerî û ewlehiya neteweyî ya xwe ye, belkî parastina aramî û ewlehiya tevahî heremê ye.
Rêxistina Hevkariya Îslamî: Suîkasta li Tehranê binpêkirina cidî ya serweriya Îranê ye
Di daxuyaniya ku piştre ji aliyê Rêxistina Hevkariya Îslamî ve hat dayîn de, hat gotin ku wan “Îsraîl bi tevahî ji êrîşa hovane berpirsyar dibînin” û ev suîkastê wekî “binpêkirina cidî ya serweriya Îranê” bi nav kir.
Lê belê di daxuyaniyê de piştgirî nedan tevgereke leşkerî ya gengaz a Îranê.
Serokê Rêxistina Hevkariya Îslamî Mamado Tangara destnîşan kir ku kuştina Haniye “potansiyela wê heye ku bibe sedema pevçûnek mezintir ku dikare herêmek tevde bibe.”
Şîroveya Erebistana Siûdî ya li ser kuştina Haniye jî ji Alîkarê Wezîrê Karên Derve Valid el Hureycî hat.
Hureycî anî ziman ku ev êrîş “binpêkirineke eşkere” ya serweriya Îranê ye.
Têkiliyên dîplomatîk ên li Rojhilata Navîn ji serê hefteyê ve dewam dikin.
Biden bi lîderên Urdin, Misir û Qeterê re axivî
Serokê Amerîka Joe Bide îro Sêşemê bi rêya telefonê bi lîderên Urdun, Misir û Qeterê re axivî.
Wezîrê Karên Derve yê Amerîkayê Antony Blinken jî got:
“Divê tu kes vê pevçûnê mezintir neke.
Em bi hevalbend û hevkarên xwe re têkiliyên dîplomatîk ên cidî didomînin û vê peyamê rasterast ji Îranê re dişînin.
Me jî rasterast ev peyam da Îsraîlê.”
Serokomarê Fransayê Emmanuel Macron jî li gel hevtayê xwe yê Îranî Mesûd Pezeşkiyan pêwendiyeke telefonî pêk anî.
Macron tekez kir ku zêdebûna şer ji aliyê Îranê ve dê ziyaneke mayînde bide aramiya herêmê.
