Yek ji gavên siyasî yên herî sereke di pêvajoya veguheztina Sûriyeyê de qediya.
Serokê Hikumeta Demkî a Şamê Ehmed el-Şara navê 70 endam ji bo parlamentoya demkî tayîn kirî eşkere kir.
Bi vî awayî, parlamentoya ji 210 kursiyan pêk tê temam dibe.
Lêbelê, rexneyên li ser temsîliyeta Kurdan, nebûna Suweydayê ji bo parlamentoyê û pêvajoya hilbijartinê di rojevê de dimînin.
Pêvajoya avakirina parlamentoya demkî ya Sûriyê bi tayînkirina 70 endaman ji aliyê Serokê Hikumeta Demkî a Sûriyê Ehmed el-Şara ve gihîştiye qonaxa xwe ya dawî.
Ji 210 parlamenteran 127 endamên Meclîsa Gel pêvajoya tayînkirina beriya niha de hatibûn diyarkirin.
Di Gulanê de, tayînkirinên li parêzgeha Hesekê jî pêk hatibûn.
3 kursiyên ku ji bo Suweydayê hatine veqetandin ji ber fikarên ewlehiyê hîn nehatine dagirtin.
PARLAMENTOYA TAYÎNKIRÎ A SÛRIYÊ 6’Ê TÎRMEHÊ TÊ VEKIRIN
Komîteya Bilind a Dadwerî ya Hilbijartinên Parlamentoyê, ku bi hikûmeta demkî ve girêdayî ye, ragihand ku rûniştina yekem a parlamentoyê wê 6’ê Tîrmehê were lidarxistin.
Di nav kesên ku hatine tayînkirin de 15 jin hene.
Bi vî awayî hejmara giştî ya parlamenterên jin ên li parlamentoyê digihêje 21’an.
Lêbelê, pêvajoya avakirina parlamentoyê jî di bin lêkolînê de ye.
Rêveberan derbarê belavkirina etnîkî û olî ya endamên tayînkirî de agahî parve nekirine.
Her çend rexne li ser hejmara kêm a kursiyên ku ji Kurdan re hatine veqetandin dewam dikin jî, rastiya ku Suweyda hîn di parlamentoyê de nayê temsîlkirin jî bûye mijara nîqaşê.
Cîgirê Nûnerê Taybet ê Neteweyên Yekbûyî ji bo Sûriyeyê Claudio Cordone, jî fikarên xwe li ser derengketina avakirina parlamentoyê anî ziman.
Gelek rêxistinên mafên mirovan ên li Sûriyeyê daxuyaniyek hevbeş weşandin û hişyarî dan ku rêbaza heyî ya hilbijartin û tayînkirinê dikare serxwebûna parlamentoyê û pirrengiya siyasî qels bike.
Di daxuyaniyê de banga temsîliyeteke xurttir a jin, Kurdan û komên civakî yên cûda li welêt hat kirin.
Parlamentoya li gorî destûra demkî ya ku di Adara 2025’an de ket meriyetê, hatiye avakirin, wê erkên xwe yên qanûndanînê heta ku destûreke daîmî were amadekirin û hilbijartinên giştî werin lidarxistin, bidomîne.
