Şêwirmendê Trump Gabriel Soma: Hevalbendiya me bi QSD’ê re stratejîk e

Endamê Meclisa Şêwirmend a Serokê Amerîkayê Donald Trump Gabriel Soma diyar kir ku “Amerîka stratejiya xwe li Sûriyê li ser esasê lawazkirina Rûsya û Îranê ava kiriye”. Soma li ser hevalbendiya Amerîka û QSD’ê jî piştrast kir ku hevalbendiya wan bi QSDê re stratejîk e. 

Endamê Mecilsa Şêwirmend a Serokê Amerîkayê Donald Trump û Profesorê qanûna navnetewyî Gabriel Soma, der barê aloziya li Rojhilata Navîn û berjewendiyên navdewletî û herêmî, ji Ajansa ANHA’yê re nirxandin kir.

Soma diyar kir ku Amerîka li Sûriyê stratejiya xwe li ser esasê lawazkirina Rûsya û Îranê ava dike..

Soma dibêje:

“Ji bo dîtina çareseriyeke aştiyane ji pirsgirêka Sûriyê re, têkiliyên Rûsya jî bi hikumeta Şamê re ne baş in.

Hebûna van hêzên biyanî li Sûriyê di dema niha de, biryara Meclisa Ewlehiyê ya 2254an, bin pê dike.”

Ji bo hebûn hêzên Amerîkî li herêmê jî, Soma eşkere kir ku “hebûna wan li Bakur û Rojhilatê Sûrî tenê ji bo DAIŞê bû û aniha jî ew ji bo piştgiriyê bidin operasyonên li dijî çeteyan, li vir mane.”

Li ser gefên DAIŞ û Dewleta Tirk ên li dijî heman herêman jî Soma got:

“Heta hêzên Amerîkî li Bakur û Rojhilatê Sûrî bin, texmîn nakim wê zirar bigihê hevalbendên me.

Hevalbendiya Amerîka û QSD’ê, hevalbendiyeke stratejîk e û ji bo tunekirina DAIŞ’ê ye.”

Gabriel Soma bal kişand ser pirsgirêkên di navbera Rûsya û Esed de û eşkere kir ku “li gel Rûsya, ti deriyek ji bo çareserkirina pirsgirêkên bi Esed re tune ye, diyar e di navbera wan gelek pirsgirêkên siyasî hene û Esed ji pêşniyarên Rûsya yên çareserkirina pirsgirêkên siyasî ne razî ye.”

Herî dawî jî Şêwirmendê Trump Gabriel Soma got:

“Erka me çareserkirina pirsgirêkê ji hêla NY’yê li gorî biryara 2254 e û divê Rûsya dûrî Esed û Îranê be û Rûsya jî baş vê yekê dizane.”

Back to top button